काठमाडौं– विभाजित नेकपाको केपी शर्मा ओली समूहका प्रवक्ता प्रदीपकुमार ज्ञवालीले दाहाल–नेपाल समूहले घोषणा गरेको आन्दोलनको औचित्य नभएको बताएका छन्।
बालुवाटारमा बसेको केन्द्रीय समिति बैठकले गरेको निर्णय सार्वजनिक गर्ने क्रममा उनले यस्तो बताएका हुन्।
‘हामीले त्यो आन्दोलनको कुनै औचित्य देख्दैनौं। जनमत जुटाउन जान छोडेर आन्दोलनको नाममा जनतालाई थप पीडा दिनु भनेको जनमतबाट पलायन हुनु र तर्सिनु हो,’ उनले भने, ‘म आग्रह गर्न चाहन्छु त्यो निर्णय फिर्ता लिएर निर्वाचनको वातावरणमा जानुहोस्।’
वर्तमान संसदमा प्रधानमन्त्रीले नेतृत्व गरेको नेकपा बहुमतसहित प्रतिनिधित्व गरेको नेकपा भएको उनको दाबी छ।
उनले रिक्त मन्त्रालयमा छिट्टै मन्त्रीहरु नियुक्त गरिने बताए। ‘धेरै समय खाली राख्न मिल्दैन,’ उनले भने,‘अब हामी त्यसतर्फ ध्यान दिएर अघि बढ्ने तयारीमा छौं।’ प्रधानमन्त्री ओलीले संसद् विघटन गरेपछि दाहाल–नेपाल समूहबाट सरकारमा प्रतिनिधित्व गर्ने सात मन्त्रीहरुले राजीनामा दिएका छन्।