काठमाडौं– बुधबार रातिको जितसँगै ला लिगामा साविक विजेता रियल मड्रिडले शीर्षस्थानको एथ्लेटिको मड्रिडसँग अंक बराबरी गरेको छ।
रियलको घरेलु मैदानमा भएको खेलमा उसले पाहुना टिम ग्रानाडालाई २–० गोल अन्तरल हराउँदै अंक बराबरी गरेको हो।
रियलको जितका लागि कासिमेरो र करिम बेञ्जेमाले समान १–१ गोल गरे। खेलको पहिलो हाफ गोल रहित बराबरीमा रोकिएपछि कासिमेरोले पहिलो गोल नै दोस्रो हाफमा गोल गरे।
मार्को एसेन्सियोले ५७ औं मिनेटमा दिएको पासलाई उपयोग गर्दै कासिमेरोले गोल गरे। त्यस्तै, खेलको अतिरिक्त समयमा इस्कोलोले दिएको पासलाई बेञ्जेमाले गोलमा बदल्दै २–० को जित कायम गरेका थिए।
२–० को जितसँगै रियलले १५ खेलबाट ३२ अंक बनाएको छ भने दुई खेल कम खेलेको एथ्लेटिको मड्रिडको ३२ अंक छ।
त्यस्तै रियल सोसिडाड र भिल्ला रियल समान २६ अंकका साथ तेस्रो र चौथो स्थानमा छन्।
खराव सुरुवात गरेको रियल मड्रिडले पछिल्ला ६ खेलमा लगातार जितको शृंखला कामय राखेको छ र ला लिगामा लगातार पाँच खेल जित्दै लयमा फर्किएको छ।
तर बुधबार रातिको खेल उसका लागि घातक सिद्ध भयो। रियलको भरपर्दा ब्राजिलियन विंगर रोड्रिगो ह्यामस्ट्रिङ इन्ज्युरीका कारण मैदान बाहिरिएका छन्।
ला लिगामा गएराति नै सम्पन्न खेलमा रियल बेटिसले कार्डिजलाई १–० गोलले हराएको छ भने अलाभेसले आइबरलाई २–१ गोलले हराएको छ।