संसद् विघटनको विरोधमा कांग्रेसले पुुस १६ गते देशभर प्रदर्शन गर्ने 

काठमाडौं– नेपाली कांग्रेसले संसद् विघटनको विरोधमा पुस १६ गते देशभर प्रदर्शन गर्ने निर्णय गरेको छ। 

कांग्रेस केन्द्रीय कार्य समितिको बुधबार बसेको बैठकले राष्ट्रिय मेलमिलाप दिवसका दिन देशभर विरोध प्रदर्शन गर्ने निर्णय गरेको बैठकपछि प्रवक्ता विश्वप्रकाश शर्माले बताए। 

बैठकमा कांग्रेस सभापति शेरबहादुर देउवाले संसद् विघटनको विरुद्ध आन्दोलन गर्ने प्रस्ताव गरेका थिए। 

बैठकमा बोल्ने नेताहरूले संसद् विघटन गर्ने प्रधानमन्त्री केपी शर्मा ओलीको कदम निरंकुशतातर्फ उन्मुख रहेको बताएका थिए।

बैठकमा गगन थापा, रामशरण महत, आनन्द ढुंगाना र बलबहादुर केसीले आआफ्नो धारणा राखेका थिए।

कांग्रेस पदाधिकारी बैठकले संसद विघटन असंवैधानिक रहेको र यसलाई राजनीतिक रूपमा प्रतिरोध गर्ने निर्णय गरिसकेको छ।

यस्तै कांग्रेस अगुवाइमा भएको सर्वदलीय बैठकले पनि संसद् विघटन गर्ने प्रधानमन्त्री ओलीको कदलाई असंवैधानिक ठहर गरेको छ।