काठमाडौं– नेकपा उपाध्यक्ष वामदेव गौतमले आफू अहिले कुनै पक्षको भेला वा बैठकमा सहभागी नहुने बताएका छन्।
साेमबार बिहान उनलाई भेट्न पुगेका नेकपा अध्यक्ष पुष्पकमल दाहाल– माधवकुमार नेपाल पक्षीय नेताहरूसँग उनले यस्तो जबाफ दिएका हुन्।
नेताहरूले गौतमलाई दिउँसो डाकिएको नेकपा केन्द्रीय कमिटी बैठकमा सहभागी हुन अनुरोध गरेका थिए।
‘हामीले आउनुहोस्, हामीलाई सहयोग गर्नुहोृस् भन्यौं तर उहाँले अहिले बैठकमा कुनै बैठकमा सहभागी नहुने जबाफ दिनुभयो’, बैठकमा सहभागी एक नेताले नेपाल समयसँग भने।
छलफलका लागि गौतम निवास भैंसेपाटीमा नेकपाका वरिष्ठ नेता झलनाथ खनाल, वरिष्ठ नेता माधवकुमार नेपाल र नेकपा प्रवक्ता नारायणकाजी श्रेष्ठ पुगेका थिए।
गौतमले ओली र दाहाल दुवैले बोलाएको केन्द्रीय कमिटीमा उपस्थित नहुने जनाएपछि नेताहरु उनलाई मनाउन निवासमै पुगेका हुन्।