पीएम कप महिला राष्ट्रिय क्रिकेट पुस ११ देखि १९ सम्म

काठमाडौं- प्रधानमन्त्री (पीएम) कप महिला राष्ट्रिय क्रिकेट प्रतियोगिता २०७७ आगामी पुस ११ गतेबाट १९ गतेसम्म हुने भएको छ।

नेपाल क्रिकेट संघ (क्यान) ले आज (सोमबार) एक सूचना जारी गर्दै पीएम कपको तालिका सार्र्वजनिक गरेको हो।

तालिकाअनुसार प्रतियोगिताका सबै खेल दाङको लमही मैदानमा हुनेछन्। कपमा सात प्रदेशका सात टिम र सशस्त्र प्रहरीको विभागीय टिम एपीएफ सहभागी हुने छन्।

आठ टिमलाई दुई समूहमा बाँडेर खेल गराउने क्यानले जनाएको छ। जससमा एपीएफ, प्रदेश २, कर्णाली र लुम्बिनी समूह ए मा छन् भने सुदूरपश्चिम, वागमती, गण्डकी र प्रदेश १ समूह बीमा छन्।

समूह चरण अन्तर्गत एक दिनमा दुई खेल हुनेछन् भने सेमिफाइनलका दुबै खेल पुस १७ गते हुनेछन्। समूह चरण र सेमिफाइनल खेलबीच ब्रेक हुने छैन तर सेमिफाइनल र फाइनलबीच एकदिन खेलाडीले आराम पाउनेछन्।

तालिकाअनुसार फाइनल खेल पुस १९ गते हुनेछ।

पहिलो सेमिफाइनल खेलमा समूह ए को विजेता र बीको उपविजेताले प्रतिस्पर्धा गर्नेछन् भने दोस्रो सेमिफाइनलमा समूह बीको विजेता र ए को उपविजेताले प्रतिस्पर्धा गर्नेछन्।