केपी ओलीको समर्थनमा पोखरामा र्‍याली

पोखरा- प्रधानमन्त्री केपी शर्मा ओलीको कमदप्रति समर्थन जनाउँदै पोखरामा युवा संघ नेपालका ओली पक्षीय कार्यकर्ताले नारा जुलस गरेका छन्।

पोखराको मानवअधिकार चोकमा आयोजित कार्यक्रममा युवासंघका केन्द्रीय उपाध्यक्ष माधव बाँस्तोलाले सरकारलाई असफल पार्न दलभित्रबाटै षड्यन्त्र रचिएको भन्दै प्रधानमन्त्रीको यो कदम वाध्यताको उपज रहेको बताए।

प्रधानमन्त्रीलाई असफल बनाउन गुटबन्दी गर्नेहरु अब पाखा लागेको उनको भनाइ थियो। गलत व्यक्तिको हातमा सत्ता सुम्पेर मुलुकलाई वर्बाद गर्नुभन्दा प्रधानमन्त्रीले जनादेशको सहारा लिएको उनले बताए। 

शक्तिको तुजुक देखाउने प्रचण्डलाई अबको चुनावमा जितेर देखाउन उनले चुनौती दिए। 

कार्यक्रममा अनेरास्ववियुका कास्की अध्यक्ष विवेक देवकोटाले पार्टीभित्रका धमिरा अब पाखा लागेको बताए। युवा संघले पुस १० गते पोखरामा प्रदेशस्तरीय भेलासमेत बोलाएको छ।