संसद् विघटनपछि दलहरु सक्रिय, कांग्रेसले बोलायो सर्वदलीय बैठक 

काठमाडौं- प्रधानमन्त्री केपी शर्मा ओलीको प्रस्तावमा राष्ट्रपति विद्यादेवी भण्डारीले संसद् विघटन गरेसँगै दलहरु सक्रिय भएका छन्। 

सत्तारुढ नेपाल कम्युनिष्ट पार्टी (नेकपा)का दुई समूह छुट्टाछुट्टै छलफलमा जुटेका छन् भने प्रतिपक्षी दल नेपाली कांग्रेसले सर्वदलीय बैठक डाकेको छ। 

प्रधानमन्त्रीले संसद् विघटन गरेसँगै अब चाल्नुपर्ने कदमका विषयमा छलफल गर्न कांग्रेसले दिउँसो ४ बजेका लागि सर्वदलीय बैठक डाकेको हो। 

कांग्रेस केन्द्रीय कार्यालय सानेपामा बस्ने गरी डाकेको बैठकमा संसदमा रहेका विपक्षी दलसँगै सत्तारुढ नेकपाका कार्यकारी अध्यक्ष पुष्पकमल दाहाल प्रचण्ड वरिष्ठ नेता माधवकुमार नेपाल समूह पनि सहभागी हुने जनाइएको छ। 

आइतबार साँझ सिंहदरबारस्थित कांग्रेस संसदीय दलको कार्यालयमा संयुक्त बैठक बसी नेपाल कम्युनिष्ट पार्टी, नेपाली कांग्रेस र जनता समाजवादी पार्टीले सरकारको संयुक्त प्रतिवाद गर्ने निर्णय गरेका थिए।

कांग्रेसले बोलाएको सर्वदलीय बैठकमा सहभागी हुनुपूर्व दाहाल-नेपाल समूह अलग्गै छलफलमा बस्ने भएको छ। आगामी कदमका विषयमा रणनीति बनाउने उनीहरुको तयारी छ । 

यस्तै जनता समाजवादी पार्टी र राष्ट्रिय प्रजातन्त्र पार्टी पनि आन्तरिक छलफलमा जुटेका छन्। प्रधानमन्त्रीको कदमलाई सबैजसो दलहरुले अंसवैधानिक र गलत निर्णय भन्दै प्रतिवाद गरेका छन्। 

हिजो (आइतबार) मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधिसभा विघटन गर्दै वैशाख १७ र २७ गते मध्यावधि चुनावको घोषणा गरेकी थिइन्।