काठमाडौं– डिसेम्बर १३ मा लियोनविरुद्ध सम्पन्न लिग वानको खेलमा चोटग्रस्त बनेका ब्राजिलियन फरवार्ड नेयमार आउँदो जनवरीमा मैदान फर्कने भएका छन्।
घुँडाको चोटका कारण नेयमारलाई मैदानबाट स्ट्रेचरमा बोकेर बाहिर निकाल्नु परेको थियो।
यस्तो अवस्थामा नेयमारको चोट ठीक हुन कति समय लाग्छ भन्ने स्पष्ट भइसकेको थिएन।
पेरिस सेन्ट जर्मेन (पीएसजी)ले एक सूचना जारी गर्दै उनी जनवरीमा मैदान फर्कने बताएको हो।
खेलका क्रममा उनलाई मैदानमा लडाएका लियोनका थियागो मेन्डेस खेलमा रेडकार्ड पाएर मैदान बाहिरिएका थिए।
‘उनको हड्डीमा केही चोट लागेको छ र उनी उपचारका क्रममा छन्। उनी जनवरीमा मैदान फर्कन सक्ने अपेक्षा गरिएको छ,’ पीएसजीले जारी गरेको सूचनामा भनिएको छ।
यता पीएसजीका प्रशिक्षक थोमस टुचेलले डिसेम्बरको १३ को खेलपछि नेयमारले आज (आइतबार)को खेलमा मैदान पस्ने बताएका थिए। तर, उनी फर्कन सकेनन्।
पीएसजीले आउँदो वर्षको फेब्रुअरी १७ मा नेयमारले पूर्वक्लब बार्सिलोनाविरुद्ध प्रि-क्वार्टरफाइनलमा खेल्न पाउने बताएको छ। पीएसजी र बार्सिलोनाले च्याम्पियन्स लिगको अन्तिम १६ मा आपसमा प्रतिस्पर्धा गर्दैछन्।
नेयमार २०१७ मा बार्सिलोनाबाट विश्व कीर्तिमानी मूल्य २२२ मिलियन युरोमा फ्रेन्च क्लब गएका थिए।
उनले फ्रेन्च क्लबलाई तीन लिग वान जिताएका छन् भने टिमलाई पहिलो पटक च्याम्पियन्स लिगको फाइनलसम्म पुर्याएका छन्।