काठमाडौं। भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले लिम्पियाधुरासहितकाे नेपालको नक्सा जारी गर्ने क्रममा आफूलाई लोभलालच र धाकधम्की आएको खुलासा गरेकी छन्।
‘नक्साको काम रोक्न निकै ठूलो प्रलोभन र धाकधम्की आएको थियो,’ उनले भनिन्, ‘मैले यसमा खुट्टा नटेकौँ भन्ने चाहेको भए मेरो पुस्ता-पुस्तालाई पुग्ने प्रस्ताव आएका थिए।’
ललितपुरमा भएको एक कार्यक्रममा उनले नेपालको नक्सा सार्वजनिक गर्न चुनौतीका पहाडहरू झेल्नु परेको बताएकी हुन्।
आफू प्रलोभनमा नपरेको र धाकधम्कीसँग नडराएकै कारण आज मुलुकले लिम्पियाधुरा, कालापानी र लिपुलेक समेटिएको नक्सा पाएको उनको भनाइ छ। मन्त्री अर्यालले अब जमिन पनि प्राप्त गरिने बताइन्।
तर, उनले कसले प्रलाेभनमा पार्न खाेजेकाे र धाकधम्की दिएकाेबारे भने केही खुलाइनन्।
यस्तै उनले सगरमाथाको उचाइ बढेको विषयलाई विश्वले महत्त्वका साथ हेरेको बताएकी छन्।