अर्थ समाचार

विदेशी लगानीका बैंकको नाफा घट्यो, १० वटाले कोरोनामा पनि कुस्त कमाए

1611823333.jpg

काठमाडौं– चालू आर्थिक वर्षको पहिलो ६ महिनामा वाणिज्य बैंकहरुले २९ अर्ब ३७ करोड रुपैयाँ खुद नाफा कमाएका छन्। यो नाफा गत आवको सोही अवधिको तुलनामा २.१९ प्रतिशत कम हो। 

NLG Insurance
agrakhi
Yeti parketing

यस अवधिमा १० वटा बैंकले बढी कमाएका छन् भने १६ वटाको नाफा घटेको छ। 

विदेशी लगानीका वाणिज्य बैंकहरुको नाफा चालू आवको पहिलो ६ महिनामा घटेको छ। हिमालयन बैंक, नेपाल एसबिआइ बैंक, स्ट्याण्डर्ड चार्टर्ड बैंक र एभरेष्ट बैंकको नाफा घटेको हो। हिमालयन बैंकको नाफा ६२.५१ प्रतिशतले घटेको छ। नेप्सेमा सूचीकृत वाणिज्य बैंकहरुमध्ये यो घाटा सबैभन्दा धेरै हो। नेप्सेमा २६ वटा वाणिज्य बैंकहरु दोस्रो बजार कारोबारका लागि सूचीकृत छन्। 

हिमालयन बैंकले चालू आवको पहिलो ६ महिनामा ६५ करोड ३२ लाख रुपैयाँ कमाएको छ। गत वर्षको सोही अवधिमा उसले १ अर्ब ४७ करोड कमाएको थियो। त्यसपछि नाफा घट्नेमा क्रमशः नेपाल एसबिआइ, स्ट्याण्डर्ड चार्टर्ड र एभरेष्ट बैंक छन्। यी बैंकको नाफा गत आवको पुस मसान्तको तुलनामा क्रमशः ४८.४२, ४०.६९ र ३६.२९ प्रतिशतले घटेको छ।

एसबिआइले ५१ करोड ४८ लाख, स्ट्याण्डर्ड चार्टर्डले ७२ करोड ७६ लाख र एभरेष्टले ९६ करोड १९ लाख रुपैयाँ नाफा कमाएका छन्।

गत वर्षको पुस मसान्तसम्ममा यी चारवटै बैंकले एक अर्बभन्दा बढी नाफा कमाएका थिए। कोरोना महामारीका कारण उद्योग–व्यवसाय चौपट भएको र सबैभन्दा बढी कर्पोरेट ग्राहक भएका कारण यी बैंकले आफ्ना ग्राहकबाट कर्जा उठाउन नसक्दा नाफामा कमी आएको जानकारहरु बताउँछन्।

नेपाल राष्ट्र बैंकले गत आर्थिक वर्षको कर्जा तिर्ने म्याद गत पुस मसान्तसम्म दिएका कारण पनि उनीहरुले कर्जा रिकभरीमा जोड नदिएका हुन्। त्यसको असर नाफामा देखिएको छ। हिमालयन बैंकमा हबिब बैंक लिमिटेड पाकिस्तान, एसबिआइमा स्टेट बैंक अफ इन्डिया, स्ट्याण्डर्ड चार्टर्ड बैंकमा स्ट्याण्डर्ड चार्टर्ड बैंक बेलायत र एभरेष्ट बैंकमा पञ्जाब नेशनल बैंकको लगानी छ।

कोरोना महामारीका बाबजुद पनि १० वटा वाणिज्य बैंकले भने राम्रो नाफा कमाएका छन्। पुस मसान्तसम्ममा गत वर्षको तुलनामा सबैभन्दा बढी कुमारी बैंकले कमाएको छ। यो अवधिमा उसले आफ्नो नाफा ५१.५० प्रतिशतले बढाएको छ।

कुमारीले गत वर्षको पुससम्ममा ८० करोड ३० लाख रुपैयाँ नाफा कमाएकोमा चालू आवको सोही अवधिमा १ अर्ब २१ करोड ६५ लाख रुपैयाँ कमाउन सफल भएको छ।

गत वर्षको तुलनामा नाफा बढाउने बैंकहरुमा एनएमबि, प्रभु, प्राइम कमर्सियल, ग्लोबल आइएमई पनि छन्। यी बैंकले क्रमशः ४८.७६, ३९.८७, ३९.४० र ३७.३२ प्रतिशत नाफा वृद्धि गरेका छन्। 

त्यसैगरी मेगा बैंकले ३७.२८ प्रतिशत, सिटिजन्स बैंक इन्टरनेशनलले २७.२६ प्रतिशत, नेपाल बंगलादेश बैंकले १६.५२ प्रतिशत, एनआइसी एशिया बैंकले २.२० र सनराइज बैंकले ०.५३ प्रतिशतले नाफा बढाएका छन्। 

गत पुस मसान्तसम्ममा नाफा प्रतिशत सबैभन्दा बढी कुमारीले बढाए पनि बढी नाफा कमाउने बैंक भने ग्लोबल आइएमई हो। उसले यो अवधिमा २ अर्ब ३१ करोड रुपैयाँ नाफा कमाएको छ। 

त्यस्तै एनआईसी एशियाले २ अर्ब ६ करोड, नबिलले २ अर्ब १ करोड, प्राइम कमर्सियलले १ अर्ब ८१ करोड, एनएमबिले १ अर्ब ६६ करोड, नेपाल इन्भेष्टमेण्टले १ अर्ब ५८ करोड, प्रभुले १ अर्ब ५१ करोड, नेपाल बैंकले १ अर्ब ३५ करोड, कृषि विकास बैंकले १ अर्ब ३५ करोड, मेगाले १ अर्ब ३० करोड र सानिमा बैंकले १ अर्ब ६ करोड रुपैयाँ नाफा कमाएका छन्।

कुन वाणिज्य बैंककाे नाफा कति ?

प्रतिक्रिया दिनुहोस्