ओली संवैधानिक परिषद् सम्बन्धी अध्यादेश फिर्ता लिन सहमत

काठमाडौं– प्रधानमन्त्री एवम् नेकपा अध्यक्ष केपी शर्मा ओली संवैधानिक परिषद् सम्बन्धी अध्यादेश फिर्ता लिन सहमत भएका छन्।

प्रधानमन्त्री  ओली, कार्यकारी अध्यक्ष पुष्पकमल दाहाल र महासचिव विष्णु पौडेलबीच भएको छलफलमा उनी अध्यादेश फिर्ता लिन सहमत भएका हुन्। 

यस्तै अध्यक्ष दाहाल संसद्को विशेष अधिवेशन डाक्ने प्रक्रियाबाट बाहिरिएका छन्। तीन नेताबीच यस्तो सहमति भएपछि नेकपा अध्यक्ष ओली स्थायी कमिटी बैठकमा प्रवेश गरेको उच्च स्रोतले बतायो।

प्रधानमन्त्री ओलीले संवैधानिक परिषद्सम्बन्धी अध्यादेश ल्याएपछि नेकपाभित्रको विवाद थप चुलिएको छ। संसद् छलेर अध्यादेश ल्याइएको भन्दै केही नेताहरू संसद् बैठक डाक्न माग गर्दै सांसदहरुको हस्ताक्षरसहित राष्ट्रपति कार्यालय शीतल निवास पुगेका थिए। 

तीन नेताबीच एउटाले अध्यादेश फिर्ता लिने र अर्को पक्षले संसद्को अधिवेशन डाक्ने प्रक्रिया स्थगित गर्ने सहमति भएपछि अध्यक्ष ओली बालुवाटारमा जारी स्थायी कमिटी बैठकमा सहभागी भएका हुन्।