काठमाडौं– संवैधानिक परिषद्सम्बन्धी अध्यादेश जारी भएपछि सत्तारुढ दलभित्रको विवाद थप चर्किएको छ।
अध्यादेशको सत्तारुढ नेकपाभित्रै तीव्र विरोध भएको छ।
सचिवालयका बहुमत सदस्यहरु नेकपाका कार्यकारी अध्यक्ष पुष्पकमल दाहालसँग छलफल गर्न खुमलटार पुगेका छन्।
नेताहरूबीच अध्यादेश जारी भएपछि उत्पन्न राजनीतिक परिस्थितिबारे र भावी रणनीतिबारे छलफल हुने बताइएको छ।
कार्यकारी अध्यक्ष दाहाल, वरिष्ठ नेताद्वय झलनाथ खनाल, माधव नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठ लगायतका नेताहरुबीच अहिले खुमलटारमा छलफल भइरहेको छ।
नेताहरुबीच अब कसरी अघि बढ्ने भन्ने रणनीति तय गर्न लागिएको दाहाल निकट स्रोतले बतायो।
प्रधानमन्त्री ओलीले मंगलबार बिहान बसेको मन्त्रिपरिषद् बैठकमार्फत अध्यादेश ल्याउने निर्णय गरेपछि विवाद चर्किएको हो।
आजै राष्ट्रपतिले सरकारले सिफारिस गरेको अध्यादेश जारी गरेकी थिइन्। प्रमुख प्रतिपक्षी दलले पनि यसप्रति कडा विराेध जनाएकाे छ।