काठमाडौं – अस्ट्रेलियामा जारी बिग ब्यास लिग (बीबीएल) क्रिकेटमा प्रतिस्पर्धा गर्न लेग स्पिनर सन्दीप लामिछाने त्यसतर्फ गएका छन्।
उनले सामाजिक सञ्जाल फेसबुकमा विमानस्थलको तस्बिर राख्दै आफू चाँडै दक्षिण अस्ट्रेलियाको सहर एडलेडमा पुग्ने बताएका छन्।
अस्ट्रेलियाको सबैभन्दा महँगो ट्वान्टी २० लिग बीबीएल खेल्ने नेपालका एकमात्र खेलाडी हुन् सन्दीप। उनी जारी सिजनमा होबर्ट हुरिकेन्सबाट प्रतिस्पर्धा गर्दै छन्।
यसअघि उनले मेलबर्न स्टार्सबाट दुई सिजन खेलिसकेका छन्।
केही समयअघि लामिछानेलाई कोभिड–१९ संक्रमण देखिएकाले उनी समयमै त्यसतर्फ जान सकेका थिएनन्।
उनी अस्ट्रेलिया पुगेपछि क्वारेन्टिनमा बस्नुपर्नेछ। यसकारण उनले बीबीएलको प्रारम्भिक सात खेल गुमाउनेछन्।
लिगमा अहिलेसम्म होबर्ट हुरिकेन्सले दुई खेलमा जित निकाल्दै सात अंक जोडिसकेको छ। हुरिकेन्स शीर्षस्थानको मेलबर्न स्टार्सभन्दा एक अंकले पछाडि छ।
बीबीएलमा मेलबर्न स्टार्स, होबर्ट हुरिकेन्स, सिड्नी सिक्सर्स, मेलबर्न रेनेग्डेस, सिड्नी ठन्डर्स, ब्रिसबन हिट, एडलेड स्ट्राइकर र पर्थ स्कुर्चस गरी आठ टिमको सहभागी छन्।