काठमाडौं– स्पेनिस ला लिगा अन्तर्गत आइतबार राति सम्पन्न खेलमा बार्सिलोनाले संघर्षपूर्ण जित निकालेको छ।
क्याम्प नाउमा सम्पन्न खेलमा बार्सिलोनाले पाहुना टिम लेभान्टेविरुद्ध १–० गोलको जित निकालेको हो।
घरेलु टिमको जितका लागि कप्तान लियोनेल मेस्सीले निर्णायक गोल गरे। डि जोङले दिएको पासलाई उपयोग गर्दै मेस्सीले ७६ औं मिनेटमा गोल गरेपछि बार्सिलोनाले जित निकालेको हो।
जितसहित ऊ अंकतालिकाको आठौं स्थानमा छ। बार्सिलोनाले ११ खेलबाट १७ अंक बनाएको छ भने पराजित लेभान्टे रेलिगेसन जोनमा छ।
साविक उपविजेता बार्सिलोना शीर्षस्थानको रियल सोसिडाडभन्दा नौ अंक पछि छ।
ला लिगाको आइतबार राति सम्पन्न अन्य खेलमा रियल सोसिडाडले आइबरसँग १–१ गोलको बराबरी खेलेको छ भने रियल बेटिस र भिल्ला रियलले पनि १–१ गोलको बराबरी खेले।