काठमाडौं- नौ महिनापछि खुल्न लागेको पशुपतिनाथको मन्दिरमा क्षमापूजा गरिने भएको छ ।
मन्दिर खोल्ने अघिल्लो दिन मङ्सिर ३० गते पशुपतिमा क्षमापूजा गर्न लागिएको पशुपति क्षेत्र विकास कोषले जनाएको छ । लामो समय मन्दिर बन्द भएकाले क्षमापूजा गरेर खोल्न लागिएको का कार्यकारी निर्देशक डा घनश्याम खतिवडाले जानकारी दिए ।
यस्तै हरेक वर्ष मार्गशीर्ष कृष्ण औँसीका दिन पशुपति मूल मन्दिर परिसरमा प्रदर्शनमा राखिने बहुमूल्य सामग्रीको प्रदर्शनी यस वर्ष नराखिने भएको छ ।
बाला चतुर्दशीको भोलिपल्ट पशुपतिको पश्चिमढोकाअघि नागमणि, एकमुखे रुद्राक्ष, गोलोचन, दाहिने शङ्खलगायतका ऐतिहासिक, पुरातात्विक, धार्मिक र सांस्कृतिक दृष्टिले महत्वपूर्ण सामग्री प्रदर्शनमा राख्ने परम्परा रहेकामा यस वर्ष कोरोना महामारीका कारण मन्दिर भक्तजनका लागि बन्द रहेकाले नदेखाइने निर्णय भएको कोषका कार्यकारी निर्देशक खतिवडाले जानकारी दिए ।
बहुमूल्य सामग्री पशुपति मेलामा आउने भक्तजनलाई लक्ष्य गरी वर्षमा एकपटक देखाउने प्राचीन कालदेखिको परम्परा यस वर्ष स्थगित गरिएको हो ।