आज भ्रष्टाचारविरुद्धको दिवस, अख्तियारमै अल्झिए ठूला काण्ड

काठमाडौं- ‘सदाचारका साथ पुनरुत्थान’ भन्ने नाराका साथ आज भ्रष्टाचारविरुद्धको अन्तर्राष्ट्रिय दिवस मनाइँदैछ ।

संयुक्त राष्ट्रसंघले सन् २००३ मा भ्रष्टाचारविरुद्धको अन्तर्राष्ट्रिय महासन्धि पारित गरेपछि विश्वभर डिसेम्बर ९ तारिखमा दिवस मनाउने गरिएको छ।

नेपालले सन् २०११ मा महासन्धिलाई अनुमोदन गरेको थियो। महासन्धि अनुसार नै नेपालले सम्पत्ति शुद्धिकरण विभाग गठन गरेको छ । 

हरेक वर्ष भ्रष्टाचार विरुद्ध विभिन्न कार्यक्रम हुँदै आएका छन् । तर, यति हुँदा हुँदै पनि नेपालमा भ्रष्टाचार न्यूनिकरण हुन सकेको छैन । केही समय अघि सार्वजनिक भएको ट्रान्सपरेन्सी इन्टरनेशनलको प्रतिवेदनले नेपालमा भ्रष्टाचार झन् बढेको देखाएको थियो ।

प्रधानमन्त्रीले नै भ्रष्टाचारको प्रोत्साहन र संरक्षण गरेको ट्रान्सपरेन्सी इन्टरनेशनलको प्रतिवेदनमा उल्लेख छ। सरकारले भने यो प्रतिवेदन राजनीतिक पूर्वाग्रह राखेर बनाइएको भन्दै अस्वीकार गरेको छ ।

भ्रष्टाचारविरुद्धको अन्तर्राष्ट्रिय दिवस मनाइरहँदा ठूला ठूला भ्रष्टाचार काण्डको फाइल वर्षौदेखि अख्तियार दुरुपयोग अनुसन्धान आयोगमा बन्द भएर बसेका छन् । बाइडबडी घोटाला प्रकरण, यति होल्डिङ, ओम्नी, तत्कालिन सञ्चार मन्त्रीले नै ७० करोड मागेको अडियो टेप प्रकरणमाथिको अनसुन्धान अहिलेसम्म टुंगिन सकेको छैन । 

नीतिगत भ्रष्टाचारको विषयमा त अख्तियारले चासोसमेत राख्न छाडेको ट्रान्सपरेन्सी इन्टरनेश्नल नेपालका अध्यक्ष खेमराज रेग्मी बताउँछन् । अख्तियार केहि सुब्बा र खरदार समाउन स्ट्रिङ अप्रेसनमा रमाउँदा ठूला भ्रष्टाचार काण्ड ओझेलमा परेको उनको भनाइ छ ।