अर्थ

स्विट्जरल्यान्डबाट पूर्वडीआईजी ठकुरीलाई आएको रकम थाहै नदिई फिर्ता 

1611148137.jpg

काठमाडौं– नेपाल प्रहरीका पूर्व डीआईजी हेमन्त मल्ल ठकुरीकी पत्नीले स्विट्जरल्यान्डबाट पठाएको रकम ग्लोबल आईएमई बैंकले फिर्ता गरिदिएको छ। 

NLG Insurance
agrakhi
Yeti parketing

संयुक्त राष्ट्रसंघमा कार्यरत पत्नीले छोराको खातामा पठाएको रकम खातावालालाई थाहा नदिई फिर्ता पठाएको र त्यसबापत उल्टो ४० हजार रुपैयाँ तिर्नुपरेपछि ठकुरीले मंगलबार साँझ एउटा ट्विट गरे।  

‘स्विटजरल्यान्डमा संयुक्त राष्ट्रसंघमा कार्यरत मेरी श्रीमतीले छोराको ग्लोबल आईएमई बंैकको खातामा पठाएको रकम खातावालालाई जानकारी नै नगराई फिर्ता पठायो। त्यसको जानकारी स्विटजरल्यान्डबाट भर्खर पाएँ र सटहीबापत रु.४० हजार पनि तिर्नुपर्‍यो,’ ठकुरीले ट्विटरमा लेखेका छन्, ‘यसरी बैंकमार्फत कानुनी रुपमा पठाएको पैसा कुनै जानकारी बिना फिर्ता पठाएबापत बैंकले कुनै जिम्मेवारी लिनुपर्छ कि पर्दैन मलाई थाहा छैन। हुन्डी किन फस्टाइरहेको छ, आफैं बुझे हुन्छ। जय होस् नेपाली बैंंकिङ व्यवस्थाको।’

पूर्वडीआईजी ठकुरीले आफ्नी पत्नीले छोराको नाममा रहेको खातामा कानुनअनुसार नै पठाएको रकम बैंकले बिना जानकारी सेवा शुल्क कट्टा गरी स्विटजरल्यान्ड नै फिर्ता गरिदिएको बताए।

उनले नेपाल समयसँग भने, ‘मैले यसबारे बैंकसँग पनि कुरा गरें तर बैंकले नेपाल र स्विट्जरल्यान्डको बैंकबीच कारोबार गर्ने मध्यस्थकर्ता कम्पनीले उक्त रकम काटेको जानकारी दियो। श्रीमतीले भने उक्त रकम नेपालको ग्लोबल आइएमई बैंकमा आएर पनि नेपाली रुपैयाँ कन्भर्ट भएपछि मात्र फर्केकाले नेपाली ४० हजार रुपैयाँ सेवा शुल्क लागेको बताएकी छन्।’

उनले उक्त रकम फिर्ता गराउन आफूले नेपाल राष्ट्र बैंकमा भनसुन नगरेको पनि बताए।

उनले भने, ‘म सीआईबीको प्रमुख हुँदा नेपाल राष्ट्र बैंकका हालका गभर्नरदेखि हरेक डिपार्टमेन्टका उच्च अधिकारीसँग राम्रो चिनजान थियो, अहिले पनि छ तर सिस्टम बसाल्नका लागि भए पनि मैले सामाजिक सञ्जाल प्रयोग गरेको हुँ।’ 

उनले अगाडि भने, ‘म जस्ता सयौं मानिसहरु बैंकबाट पीडित होलान् मैले गभर्नरलाई नै भनेर रकम त फिर्ता ल्याउँला तर, अन्य सर्वसाधारणको हकमा के हुन्छ?’ 

राष्ट्र बैंकका विदेशी विनिमय विभागका कार्यकारी निर्देशक बमबहादुर मिश्र संयुक्त राष्ट्रसंघमा काम गर्ने व्यक्तिले आफ्नो पारिश्रमिकबाट पठाएको रकम पूरै पारदर्शी हुने भएकाले बैंकले रोक्न वा फिर्ता गर्न नमिल्ने बताउँछन्।

‘किन त्यसो गरेको रहेछ यसबारे हामी बुझ्दै छौं,’ उनले भने। 

मिश्रका अनुसार ठकुरीले सम्पूर्ण व्यहोरा खुलाएर राष्ट्र बैंकको गुनासो एकाइमा निवेदन दिएमा राष्ट्र बैंकले तत्काल छानबिन गरी रकम फिर्ता गराउनका लागि पहल गर्नेछ। 

ट्विटरमा आएको सूचनाका आधारमा बैंकलाई स्पष्टीकरण सोध्न नसकिने भनाइ मिश्रको छ। 

यसबारे जानकारी लिन खोज्दा ग्लोबल आईएमई बैंकका  प्रमुख कार्यकारी अधिकृत रत्नराज बज्राचार्य र सूचना अधिकारी सुरेन्द्रराज रेग्मी दुवैको फोन उठेन।

प्रतिक्रिया दिनुहोस्