काठमाडौं– च्याम्पियन्स लिग अन्तर्गत मंगलबार राति सम्पन्न समूह चरणको अन्तिम खेलमा पराजित भएसँगै इंग्लिस क्लब म्यानचेस्टर युनाइटेड लिगबाट बाहिरिएको छ।
आरबी लाइप्जिकको मैदानमा सम्पन्न खेलमा घरेलु टिमसँग ३–२ गोलको हार बेहोर्दै युनाइटेड बाहिरिएको हो।
प्रतिस्पर्धात्मक खेलमा जितसहित लाइप्जिक भने च्याम्पियन्स लिगको नकआउट चरणमा प्रवेश गरेको छ। लाइप्जिक गत वर्षको च्याम्पियन्स लिगमा अन्तिम चारसम्म पुगेको थियो।
गएरातिको खेलमा लाइप्जिकको जितका लागि एन्जेलिनो, अमाडोउ हैडरा र जस्टिन लुइवर्टले समान १–१ गोल गरे। यता तीन गोलले पछि परेको अवस्थामा युनाइटेडका ब्रुनो फरर्नान्डेसले गोल गर्दै खेलमा फर्कन चाहे।
साथै ६१ औं मिनेटमा मैदान छिरेका पाउल पोग्वाले गोल गरेपछि युनाइटेड ३–२ गोलले पछि परेको थियो। तर अन्य गोल थप्न नसक्दा युनाइटेडले समूह चरणबाटै लिगको आगामी यात्रामा पूर्णविराम लगाएको छ।
पराजित युनाइटेड अंकतालिकाको तेस्रो स्थानमा छ भने लाइप्जिक १२ अंकका साथ दोस्रो स्थानमा छ। यसअघि शीर्षस्थानका पीएसजी, लाइप्जिक र युनाइटेडको समान ९ अंक थियो।
लिगमा समूह एचकै अर्को खेल भने स्थागित भएको छ।