कैलालीका स्थानीय तहको पहिलो चौमासिकमा खर्च न्यून 

धनगढी– कैलाली जिल्लाका स्थानीय निकायले चालु आर्थिक वर्षको पहिले चौमासिकमा ज्यादै कम खर्च गर्न सकेका छन्। 

कोष तथा लेखा नियन्त्रक कार्यालय धनगढीका अनुसार कैलालीका स्थानीय निकायले चाचू आवको पहिलो चौमासिकमा चालू र पुँजीगत गरेर १८ प्रतिशत मात्र खर्च गर्न सकेका छन्। 

जिल्लामा एक उपमहानगरपालिकासहित ६ नगरपालिका र ६ गाउँपालिका छन्। 

बर्दगोरिया गाउँपालिकाले सबैभन्दा कम १२ प्रतिशत मात्रै खर्च गरेको छ। १३ करोड ६६ लाख ९४ हजार पुँजीगत बजेट रहेको गाउँपालिकामा आर्थिक वर्षको पहिलो चौमासिक पूरा हुँदा पनि ५४ लाख ७९ हजार मात्रै पुँजीगत बजेट खर्च भएको छ। 

धनगढी उपमहानगरपालिकाले पहिलो चौमासिकमा पाँच करोड चार लाख १४ हजार मात्रै पूँजीगत बजेट खर्च गरेको छ।

चालू र पुँजीगत गरी गोदावरी नगरपालिकाले १५ प्रतिशत, गौरीगंगा नगरपालिकाले २२, घोडाघोडी नगरपालिकाले १८, टीकापुर नगरपालिकाले १६, कैलारी गाउँपालिकाले १८, चुरे गाउँपालिकाले २०, जानकी गाउँपालिकाले १४ र मोहन्याल गाउँपालिकाले १३ प्रतिशत मात्रै बजेट खर्च गरेका छन्।

कोरोना भाइरसको प्रभावसँगै कर्मचारी अभावका कारण अपेक्षाकृत रुपमा काम गर्न नसकिएको स्थानीय निकायका प्रमुखले बताउँदै आएका छन्। 

कोरोना भाइरसको प्रभावकै बीच चालू आर्थिक वर्षको पहिलो चौमासिकमा सबैभन्दा बढी जोशीपुर गाउँपालिकाले खर्च गर्न सफल भएको छ। गाउँपालिकाले चालू र पुँजीगत २७ प्रतिशत बजेट खर्च गरेको छ। 

बर्दगोरिया गाउँपालिकाका अध्यक्ष बालीराम डंगौरा थारुले विकास निर्माण लगायतका काम सञ्चालनमै रहे पनि भुक्तानी कम भएका कारण खर्च कम देखिएको बताए।