काठमाडौं। कर्णाली प्रदेशमा गुणस्तरीय र पहुँचयोग्य आँखा सेवा विस्तारका लागि नेपाल नेत्रज्योति संघ र नेपाल रेडक्रस सोसाइटीले साझेदारी गर्ने भएका छन्।
यसका लागि आज नेपाल रेडक्रस सोसाइटीको केन्द्रीय कार्यालयमा एक कार्यक्रमबीच सहमतिपत्रमा हस्ताक्षर भएको छ।
नेपाल नेत्रज्योति संघका तर्फबाट महासचिव भरतबहादुर चन्द र रेडक्रसका तर्फबाट महामन्त्री पिताम्बर अर्यालले आगामी पाँच वर्ष सहकार्य गर्ने गरी सहमतिपत्रमा हस्ताक्षर गरेका हुन्।
नेपाल रेडक्रसले कर्णाली प्रदेशमा स्थापना गरेको सुर्खेत आँखा अस्पतालको क्षमता अभिवृद्धि गरी एकीकृत कर्णाली आँखा कार्यक्रम विस्तार गरी रिफरल अस्पताल बनाउन दुवै पक्ष सहमत भएका हुन्।