काठमाडौं- सत्तारुढ दल नेपाल कम्युनिष्ट पार्टी नेकपाका केन्द्रीय सदस्य एवम् युवा नेता लेखनाथ न्यौपानेले नेकपाको कार्यशैलीका कारण कम्युनिष्ट भन्न पनि गाह्रो हुन थालेको बताएका छन्।
उनले नेकपा नेतृत्वको सरकारको बेथिति, गैर वामपन्थी चरित्र र कार्यशैलीक कारण सार्वजनिक ठाउँमा आफूलाई कम्युनिष्ट हुँ भन्न गाह्रो हुन थालेका बताए।
नेकपा अध्यक्ष केपी शर्मा ओली इतरपक्षले काठमाडौंमा आयोजना गरेको विद्यार्थी भेलामा नेता न्यौपानेले नेकपाको यो कार्यशैलीले समाजवादमा पुग्न नसकिनेसमेत स्पष्ट पारेका छन्।
उनले भने, ‘आजको हाम्रो बहस र नेकपा जहाँ अहिले छ यो अवस्थाले कहिले समाजवादको लक्ष्य हासिल गर्न सक्दैन। त्यसैले निर्मम रुपले बहस छलफल अब अघि बढ्नु आवश्यक छ।’
पूर्व विद्यार्थी नेतासमेत रहेका न्यौपानेले विद्यार्थीहरुले पनि पार्टीभित्रको बहसलाई गम्भीरतापूर्वक अगाडि बढाएर लैजान सक्नुपर्ने धारणा राखे। उनले भने, ‘अन्धभक्त भएर कसैको समर्थन नगर्नुस्। जसले टिममा काममा गर्छ त्यो नै नेतृत्व हो। व्यक्ति विशेषलाई भगवान मान्ने काम नगर्नुहोस्।’