काठमाडौं- विश्वब्यापी महामारीको रुपमा फैलिएको कोरोना भाइरसबाट एकै दिनमा विश्वभर १२ हजार ३ सय ७२ जनाको मृत्यु भएको छ ।
२४ घण्टामा यति धेरै ब्यक्तिको मृत्यु भएको यो पहिलो पटक हो । गत बुधबार नोभेम्बर २५ मा १२ हजार २ सय ६७ जनाको मृत्यु भएको थियो । एकसाता पछि उक्त रेकर्ड तोड्दै हिजो बुधबार एकै दिनमा १२ हजार ३ सय ७२ जनाको मृत्यु भएको हो।
युरोपीले मुलुक र अमेरिकामा कोरोनाको दोस्रो लहर सुरु भएसँगै मृत्युदर ह्वात्तै बढेको छ । पछिल्लो एक सातामा मात्रै कोरोनाबाट ८४ हजार १ सय ८३ जनाको मृत्यु भएको छ ।
वर्डओ मिटरका अनुसार पछिल्लो २४ घण्टामा अमेरिकामा मात्रै २ हजार ८ सय ३१ जनाको मृत्यु भएको छ । यस्तै भारतमा ४ सय ९८, ब्राजिलमा ६ सय ६९, रुसमा ५ सय ८९, फ्रान्समा ३ सय १०, स्पेनमा २ सय ७३, बेलायतमा ६ सय ४८, इटालीमा ६ सय ८४, मेक्सिकोमा ८ सय २५, पोल्यान्डमा ६ सय ९, जर्मनीमा ४ सय ५३ जनाको मृत्यु भएको छ ।
जाेन हप्किन्स विश्वविद्यालयका अनुसार हालसम्म विश्वभर कोरोना भाइरसबाट १४ लाख ९१ हजार ५ सय ५९ जनाको मृत्यु भएको छ भने ६ करोड ४४ लाख ४७ हजारभन्दा धेरै संक्रमित भएका छन् ।
अमेरिकमामा मात्रै १ करोड ३९ लाख १६ हजारभन्दा धेरै संक्रमित भएका छन् भने २ लाख ७३ हजार २ सय १६ को मृत्यु भएको छ ।