काठमाडौं- नेपाली कांग्रेसका वरिष्ठ नेता रामचन्द्र पौडेललाई तनहुँ प्रहरीले नियन्त्रणमा लिएको छ।
दुम्सीचौर सडकको बुल्दी खोलामा व्यास नगरपालिकाले निर्माण गरेको मोटरेबल पुलको उद्घाटन गर्न पुगेका पौडेललाई उद्घाटन स्थलबाट प्रहरीले नियन्त्रणमा लिएको हो।
वरिष्ठ नेता पौडेलसँगै तनहुँ कांग्रेसका कार्यबाहक सभापति जितप्रकाश आलेलाई पनि प्रहरीले नियन्त्रणमा लिएको छ।
आफूलाई प्रहरीले नियन्त्रणमा लिएको पौडेलले ट्वीटमार्फत् जानकारी दिएका छन्। भर्खर प्रहरी परिचालन गरी मलाईसमेत हिरासतमा लिएको जानकारी दिन्छु।
साधारण जनता र नेपाली कांग्रेसका कार्यकर्ता माथिको प्रहरी लाठीचार्ज र दमन तत्काल बन्द होस् पौडेलले ट्वीटमा भनेका छन्।
उपभोक्ता समितिले सर्वसम्मत निर्णय गरेर पौडेललाई पुल उद्घाटनका लागि बोलाएको थियो।
समितिले बोलाएपछि पुगेका पौडेललाई प्रहरीले उद्घाटन गर्न नदिइ माथिको आदेश भन्दै नियन्त्रणमा लिएर जिल्ला प्रहरी कार्यालयमा राखेको पौडेलका स्वकीय सचिव चिरञ्जीवी अधिकारीले जानकारी दिए।