समाचार

यसरी बलियो बने लुम्बिनीका मुख्यमन्त्री शंकर पोखरेल

  सरकारी गाडी चढेर कार्यकर्ता भेलामा जान्छन् मन्त्री

1610596401.jpg

बुटवल– लुम्बिनी प्रदेश सरकार तत्कालका लागि सुरक्षित देखिएको छ। 

NLG Insurance
agrakhi
Yeti parketing

प्रधानमन्त्री केपी शर्मा ओलीका विश्वास पात्र मानिने मुख्यमन्त्री शंकर पोखरेल दाहाल–नेपाल पक्षमा लागेका सांसदलाई आफूतिर तान्न सफल भएपछि तत्कालका लागि सरकारको संकट टरेको हो।

प्रधानमन्त्री ओलीले प्रतिनिधिसभा विघटन गरेपछि सांसदहरु ओली र दाहाल–नेपाल समूहमा विभाजित छन्। 

बागमती प्रदेशमा अविश्वासको प्रस्ताव आएसँगै दाहाल–नेपाल पक्षले लुम्बिनीमा पनि अविश्वास प्रस्ताव ल्याउन छलफल थालेको थियो। 

८६ सदस्यीय लुम्बिनी प्रदेशसभामा नेकपाका  कुल ६१ जना सदस्य छन्। जसमध्ये पूर्वमाओवादीका २० र पूर्वएमालेका ४१ जना छन्।

पूर्वमाओवादीका प्रभावशाली मानिएका लुम्बिनी प्रदेशका अर्थ, उद्योग पर्यटन समितिका सभापतिसमेत रहेका सांसद दधिराम न्यौपाने ओली खेमामा लागेपछि मुख्यमन्त्री पोखरेल थप बलियो भएका छन्। 

प्रधानमन्त्रीको कदमलगत्तै न्यौपानेले असंवैधानिक भनेर दाहाल–नेपाल पक्षको कार्यकर्ता भेलालाई सम्बोधन गरेका थिए। तर अहिले उनी ओली समूहमा लागेका छन्। 

पूर्व माओवादीका सांसदसमेत ओली पक्षमा लागेपछि दाहाल–नेपालले अविश्वासको प्रस्ताव ल्याउने हिम्मत गरेका छैनन्। 

पूर्वएमालेका विष्णु पन्थी मात्रै दाहाल–नेपाल पक्षमा खुलेका छन्। उनले प्रधानमन्त्रीको कदमविरुद्ध सर्वोच्चमा मुद्दा परेकाले तत्काल अविश्वास ल्याउने पक्षमा आफूहरु नरहेको बताए। उनले भने, ‘अहिले हामी पर्ख र हेरको अवस्थामा छौं।’ 

मुख्यमन्त्री पोखरेललाई बहुमतका लागि ४४ जना सांसद् चाहिन्छ। ओली समूहमा ४१ जना सांसद खुलेर लागेका छन्। सरकार टिकाइराख्न पोखरेललाई तीन जना सांसद् चाहिन्छ।

मुख्यमन्त्रीले रणनीतिक रुपमा पूर्वमाओवादी खेमाका सांसदलाई फकाइरहेका छन। उनी सकेसम्म नेकपाभित्रैबाट बहुमत जुटाएर सरकार जोगाउने पक्षमा रहेका एक नेताले बताए। 

पोखरेल निकट ती नेताका अनुसार नेकपाबाट सरकारमा बहुमत नपुगेको अवस्थामा मात्रै अन्य दलसँग सहकार्य गर्ने योजना छ।

नेकपा लुम्बिनी प्रदेश संसदीय दलका प्रमुख सचेतक भूमिश्वर ढकालले सरकार बहुमतमा रहेको बताउँदै तत्काल सरकार परिवर्तन नहुने बताए। 

संख्यात्मक रुपमा तीन जना मात्रै सांसद आवश्यक देखिएकाले मुख्यमन्त्रीले जनता समाजवादी पार्टी र राजमोको साथ लिन सक्ने विश्लेषण पनि एकथरीको छ। 

लुम्बिनी प्रदेशमा जनता समाजवादीका ६ र राजमोका एक जना सांसद छन्। प्रमुख विपक्षी कांग्रेसलाई राष्ट्रिय स्तरमा सहमति भएमा बाहेक सरकारमा साझेदार बनाउने सम्भावना देखिँदैन। 

प्रदेशमा कांग्रेसका १९ सांसद छन्। कांग्रेस सचेतक निर्मला क्षेत्री पार्टीले सरकारमा सहभागिताबारे सोच नै नबनाएको बताइन्। उनी भन्छिन्, ‘हामी अहिले सरकारको कदमविरुद्ध आन्दोलनमा छौं।’ 

दाहाल–नेपाल पक्षमा दुई मन्त्री

मुख्यमन्त्री पोखरेलसहित ओली पक्षमा सरकारका प्रवक्ता तथा भौतिक पूर्वाधार विकासमन्त्री बैजनाथ चौधरी र उद्योग पर्यटन वन तथा वातावरणमन्त्री लीला गिरी छन्। 

पोखरेल नेतृत्वकै मन्त्रिमण्डलका दुई मन्त्री भने प्रधानमन्त्रीको कदम असंवैधानिक भएको भन्दै प्रधानमन्त्री र मुख्यमन्त्रीको समेत आलोचना गरेर कार्यकर्ता भेलामा व्यस्त छन्। 

भूमि व्यवस्था कृषि तथा सहकारीमन्त्री आरती पौडेल वामदेव गौतम निकट भएकाले मौन बसेको बताइन्छ। 

तर, उनी ओली समूहकै कार्यक्रममा सहभागी हुने गरेकी छन्। आन्तरिक मामिला तथा कानुनमन्त्री कुलप्रसाद केसी र सामाजिक विकासमन्त्री सुदर्शन बराल भने दाहाल–नेपाल पक्षमा छन्। 

मुख्यमन्त्रीसहित बहुमत मन्त्री सरकारी गाडीमै समूहको भेलामा हुने गरेका छन् भने अर्को पक्ष पनि कार्यकर्ता भेलामा व्यस्त छ।
 

प्रतिक्रिया दिनुहोस्