काठमाडौं। सरकारले आफूहरूका मागप्रति बेवास्ता गरेको भन्दै स्वास्थ्यका क्रियाशील २३ ट्रेड युनियन तथा पेशागत संगठनले आन्दोलनमा उत्रने चेतावनी दिएका छन्।
सोमबार प्रेस विज्ञप्ति जारी गर्दै उक्त संस्थाहरूले स्वास्थ्यकर्मीले उठाएका पेशागत हकहितका विषयहरू सम्बोधन नभए जनतालाई आह्वान गरी आन्दोलनका कार्यक्रम गर्ने जनाएका हुन्।
कोरोनालगायत जनताको अन्य जटिल रोगको सम्पूर्ण उपचार राज्यले निःशुल्क गर्नुपर्ने, आईसीयू र भेन्टिलेटरलगायत उपकरणको संख्या बढाउनुपर्ने, कोरोनाको परीक्षण, उपचारको दायरा बढाउनुपर्ने, स्वास्थ्यकर्मीलाई दिइने भनिएको जोखिम भत्ता, बीमालगायतका सुविधा सहज तरिकाले उपलब्ध गराउनुपर्ने, निश्चित मापदण्डका आधारमा सबै स्वास्थ्यकर्मीलाई क्वारेन्टाइनको व्यवस्था हुनुपर्नेलगायतका मागहरू स्वास्थ्यकर्मीले राखेका छन्।
विज्ञप्तिमा स्वास्थ्यकर्मीका मागहरूप्रति स्वास्थ्य संगठनहरूले पटक-पटक स्वास्थ्य मन्त्रालयमा सम्बोधनका लागि अनुरोध गर्दा पनि त्यसतर्फ सरकारले ध्यान नदिइएको जनाइएको छ।
सरकारले अब पनि स्वास्थ्यकर्मीका मागहरूलाई सम्बोधन नगरे सडक आन्दोलनमा उत्रनुको विकल्प नभएको विज्ञप्तिमा उल्लेख छ।
यसअघि ट्रेड युनियन तथा पेशागत संगठनले मंसिर ७ मा स्वास्थ्यमन्त्री भानुभक्त ढकाललाई स्वास्थ्यका १९ वटा संगठनहरूले १८ बुँदे ज्ञापनपत्र बुझाएका थिए।
साथै हालसम्म पनि सरकारले स्वास्थ्यकर्मीको मागमा कुनै चासो नदेखाएकोप्रति ट्रेड युनियन तथा पेशागत संगठनहरूले ध्यानाकर्षण भएको जनाएका छन्।