विराटनगर–विराटनगरमा एक कोरोना संक्रमितको आइतबार बिहान होम आइसोलेसनमा मृत्यु भएको छ।
विराटनगर–९ का ७८ वर्षीय वृद्धको बिहान ८ बजेतिर होम आइसोलेसनमा ज्यान गएको विराटनगर महानगरपालिकाले जनाएको छ। महानगरपालिकाका अनुसार ज्वरो आउने र श्वास फेर्न गाह्रो हुने समस्या रहेका वृद्धको पीसीआर परीक्षण गराउँदा शनिबार रिपोर्ट पोजिटिभ आएको थियो।
रिपोर्ट पोजेटिभ आएका वृद्धलाई घरमै आइसोलेसनमा राखिएको थियो। बिहान स्वास्थ्यमा अचानक समस्या थपिएपछि उपचारका लागि अस्पताल लैजाने तयारी हुँदै गर्दा मृत्यु भएको जानकारी परिवारले महानगरलाई गराएको थियो।
यसैबीच मोरङको उर्लाबारीका एक संक्रमित पुरुषको शनिबार राति विराटनगरमा मृत्यु भएको छ। नोबेल शिक्षण अस्पतालमा उपचारका क्रममा शनिबार उर्लाबारी नगरपालिका–५ का ५५ वर्षीय पुरुषको मृत्यु भएको अस्पतालका प्रबन्धक नारायण दाहालले बताए।