काठमाडौं– फ्रेन्च लिग वान अन्तर्गत शनिबार राति सम्पन्न खेलमा साविक विजेता पेरिस सेन्ट जर्मेन(पीएसजी) बराबरीमा रोकिएको छ।
पीएसजीको घरेलु मैदानमा सम्पन्न खेलमा उसले बोरडिअक्ससँग २–२ गोलको बराबरी खेलेको हो।
खेलको १० औं मिनेटमा पीएसजीका टिमोथी पेम्बेलेले आफ्नै पोस्टमा गोल गरेपछि घरेलु टिम सुरुवातमै एक गोलले पछि परेको थियो।
यस्तो अवस्थामा ब्राजिलियन फरवार्ड नेयमारले गोल गर्दै खेललाई बराबरीमा ल्याएका थिए।
२७ औं मिनेटको उक्त गोलको एक मिनेट पनि नबित्दै मोइसे किनले गोल गरेर पीएसजीलाई अग्रता दिलाएका थिए।
तर बोरडिअक्सका यासिन एड्लीले ६० औं मिनेटमा गोल गर्दै खेललाई फेरि बराबरीमा ल्याए।
यससँगै दुवै टिमले १–१ अंक बाँडेका छन्। अंकतालिकामा २५ अंकका साथ पीएसजी शीर्षस्थानमा छ भने बोरडिअक्स १६ अंकका साथ ११ औं स्थानमा छ।
शनिबार राति नै सम्पन्न अर्को खेलमा मार्सेल्लीले नान्टेसलाई ३–१ गोलले हराएको छ।