कोरोना संक्रमणबाट सुत्केरीको मृत्यु 

विराटनगर– कोरोना संक्रमणबाट विराटनगरमा एक सुत्केरीको मृत्यु भएको छ। 

नोबेल शिक्षण अस्पताल विराटनगरमा बिहीबार राति ११ बजेतिर मोरङको रतुवामाई नगरपालिका–१० की २५ वर्षीया सुत्केरी महिलाको ज्यान गएको हो। 

अस्पतालका प्रबन्धक नारायण दाहालका अनुसार मृतक १७ दिनकी सुत्केरी हुन्। 

उपचारका क्रममा मिर्गाैलामा खराबी पाइएको र निमोनियाको पुरानै समस्या मृतकमा रहेको उनले बताए। 

सास फेर्न गाह्रो भएपछि र बोली बन्द भएपछि मंसिर १० गते बुधबार उनलाई उपचारका लागि परिवारका सदस्यले नोबेलमा भर्ना गरेका थिए। 

दाहालका अनुसार गम्भीर अवस्थामा भर्ना गरिएकी महिलालाई तत्काल आइसोलेसनमा भर्ना गरेर भेन्टिलेटरमा राख्दै उपचार थालिए पनि भोलिपल्टै ज्यान गएको हो।  

उपचारमा लापरबाही गरेर सुत्केरीको मृत्यु भएपछि अस्पतालले विभिन्न बहाना बनाएर मृत्युको कारण कोरोना देखाउने प्रयास गरेको आरोप परिवारको छ। 

बिहीबार राति नै बिरामीको मृत्यु भए पनि परिवारका सदस्य र आफन्तलाई शुक्रबार बिहान मात्रै जानकारी दिनुले पनि उपचारमा कमजोरी भयो भनेर शंका गर्ने धेरै ठाउँ रहेको मृतककी दिदीले बताइन्। 

बहिनीको मृत्युको बज्रपातसँगै भर्खर जन्मिएकी छोरीलाई कसरी हुर्काउने भन्ने अर्को तनाव थपिएको पनि सुनाइन् । 
    

सुत्केरी व्यथाले च्यापेपछि झापाको दमकस्थित आम्दा अस्पताल भर्ना गरिएकी महिलाको कात्तिक २५ गते शल्यक्रिया गरिएको थियो। 
शल्यक्रियामार्फत छोरी जन्माएकीपछि उनलाई अस्पतालले डिस्चार्ज दिएर घर पठायो। 
त्यतिबेला अस्पतालले आमा र छोरी दुवै स्वास्थ्य अवस्था राम्रो रहेको जानकारी परिवारका सदस्यलाई दिएको मृतककी दिदीले बताइन्।