कर्णाली स्वास्थ्य विज्ञान प्रतिष्ठानको ताला ४३ दिनपछि खुल्यो

काठमाडौं– कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा लागेको ताला ४३ दिनपछि खुलेको छ। 

डिन नियुक्तिको विषयलाई लिएर प्रतिष्ठानको केन्द्रीय कार्यालय जुम्लाको शैक्षिक प्रशासनमा लगाइएको ताला ४३ दिनपछि खुलेको हो।

प्रतिष्ठानको कार्यकारी परिषद्को बैठकबिनै प्रतिष्ठान सम्पर्क कार्यालयबाट उपकुलपति प्रा.डा. राजेन्द्रराज वाग्लेले तेस्रो डिन नियुक्ति गरी संस्थालाई आर्थिक भार पारेको भन्दै प्रतिष्ठान कर्मचारी कल्याणकारी समाजले असोज २८ गतेदेखि तालाबन्दी गरेका थिए। 

उपकुलपति वाग्लेले सम्पर्क कार्यालय काठमाडौंबाट प्रतिनिधिमण्डल खटाएर पटक पटक वार्ता गर्न निर्देशन दिए पनि तालाबन्दी खुल्न सकेको थिएन। पछि आफैं केन्द्रीय कार्यालयमा गएका उपकुलपतिले आन्दोलनरत पक्षसँग वार्ता बस्न नमान्दा प्रतिष्ठानमा लामो गतिरोध निम्तिएको थियो।

कल्याणकारी समाज र उपकुलपति सहितका पदाधिकारीको टोलीबीच बुधबार भएको वार्तामा तीनबुँदे सहमति जुटेपछि ताला खुलेको हो। सहमतिमा नियुक्त भएका डिन र अन्य डिनहरुको सम्बन्धमा ३ सदस्यीय कार्यदल गठन गर्ने र उक्त कार्यदलले पेस गरेको प्रतिवेदन कार्यकारी परिषद्मा पेस गर्ने सहमति भएको छ। 

त्यस्तै प्रतिष्ठानको कार्यकारी परिषद्ले आगामी सिनेट बैठकमा निर्णय गराई १ जना डिन प्रमुख रहने र अन्य संकायका डिन सहायक डिन रहने सहमति भएको छ।

त्यस्तै, ललितपुरको महालक्ष्मी स्थानमा रहेको प्रतिष्ठानको सम्पर्क कार्यालय यथाशीघ्र हटाउने र उक्त सम्पर्क कार्यालयमा कार्यरत कर्मचारीहरुलाई १ हप्ताभित्र प्रतिष्ठानको केन्द्रीय कार्यालय जुम्ला सार्ने सहमति भएको छ।