बागलुङ– बागलुङको जैमिनी नगरपालिका ९ पैँयुथन्थापमा आइतबार साँझ आगलागी हुँदा एक घरगोठ जलेर नष्ट भएको छ।
पैँयुथन्थापका ललितादेवी सर्कीनीको घर र सोही ठाउँमा बस्ने मनबहादुर नेपालीको गोठ जलेको हो। ढुंगा माटोले बनेको कच्ची घरगोठ जलेका हुन्।
ललिताको घरमा विद्युत चुहिएर लागेको आगोले छेवैमा रहेको गोठसमेत जलाएको स्थानीयले बताए। आगलागीबाट घरमा रहेका लत्ता कपडा, अन्नपात सबै जलेका छन्। केही नगद र गरगहनासमेत जलेको पीडित सर्कीनीले बताइन्।
साँझको समयमा घरमा आगलागी भएकाले मानिसहरु भने भागेर ज्यान जोगाउन सफल भएको प्रहरीले जनाएको छ।
स्थानीयवासीको सक्रियतामा आगो निभाइएको थियो। गोठमा रहेका पशु चौपायलाई समेत दाम्लो काटेर जोगाइएको स्थानीय बबिन शर्माले बताए। उनका अनुसार घरगोठ जल्दा करिब १० लाखको क्षति भएको छ।