जनकपुरधाम- पटाका पड्काएको विषयमा विवाद हुँदा आइतबार साँझ धनुषाको नगराइन नगरपालिकामा झडप भएको छ। झडपमा २४ जना घाइते भएका छन्।
नगराइन नगरपालिका ७ लवटोली गाउँमा भएको झडपमा २४ घाइते भएको जिल्ला प्रहरी कार्यालय धनुषाले जनाएको छ। झडपमा घरमा समेत तोडफोड गरिएको छ। घाइते सबैको उपचार जनकपुरधामस्थित प्रादेशिक अस्पतालमा भइरहेको छ।
शनिवार दीपावली मनाउने क्रममा एक पक्षले पटाका पड्काएपछि अर्को समुदायका व्यक्तिले विरोध गरेका थिए। सोही निहुँमा आइतबार झडप भएको प्रहरीको भनाइ छ।
झडपका क्रममा दुवै पक्षबाट लाठी र घरेलु हतियार प्रयोग भएको स्थानीयले बताएका छन्। घरेलु हतियारहरुको प्रयोग भएका कारण घाइतेको संख्या बढी हुन सक्ने बताइएको छ।
जिल्ला प्रहरी कार्यालय धनुषाका प्रमुख रमेश कुमार बस्नेतका अनुसार विवाद मिलाउन प्रहरी नायब उपरीक्षक मकेन्द्रकुमार मिश्रसहितको टोली घटना स्थलमा खटिएका छन्।