ललितपुर- ललितपुर महानगरपालिकाले फोहोरमैला व्यवस्थापन केन्द्रमा गत शुक्रबार अपराह्न भएको आगलागीको कारण पत्ता लगाउन समिति गठन गरेको छ।
महानगरपालिका विपद् व्यवस्थापन समितिका संयोजक नारायणलाल अवालेको संयोजकत्वमा अध्ययन समिति गठन भएको महानगरपालिकाका प्रमुख चिरीबाबु महर्जनले बताए। उनले भने, “आगलागी भएको एक सातामा अध्ययन प्रतिवेदन पेस गर्न निर्देशन दिएको छु। यस समितिले आगलागी हुनुको कारण, क्षति र अब यस्तो घटना नदोरिहन अपनाउनुपर्ने सुरक्षात्मक उपायसमेत प्रतिवेदनमा उल्लेख गर्नेछ।”
केन्द्रका प्रमुख सुरेन्द्रराज अवालेले आगलागी सुरु भएको एक घण्टामा आगो नियन्त्रण भएको भनाइ बताए। उनले भने, “चाडपर्व परेका बेला अन्य समयभन्दा बढी फोहोर सङ्कलन हुन्छ र भइरहेको छ ।”
समितिमा महानगरपालिकाका प्रवक्ता राजु महर्जन, नं ८ का वडाध्यक्ष हेम महर्जन, फोहोरमैला केन्द्रका प्रमुख सुरेन्द्रराज अवाले, मेकानिकल इन्जिनियर पुष्कर भट्टराई छन्। रासस