सल्यानमा देउसी–भैली खेल्न नपाइने 

सल्यान– यो वर्षको तिहारमा सल्यानमा देउसी–भैली खेल्न नपाइने भएको छ। 

कोरोना भाइरस संक्रमणको जोखिम कम गर्न जिल्ला प्रशासन कार्यालय सल्यानले देउसी–भैलीमा रोक लगाएको हो। 

कार्यालयले भीडभाड हुने खालका कुनै पनि क्रियाकलाप नगर्न आग्रह पनि गरेको छ। 

त्यस्तै बुधबार बसेको जिल्ला सुरक्षा समितिको बैठकले तिहार लक्षित सुरक्षा योजना पनि तयार पारेको छ। 

तिहारको समयमा हुन सक्ने अपराधिक गतिविधिलाई रोक्न जिल्लाभर थप सुरक्षा योजना लागू गरिएको प्रमुख जिल्ला अधिकारी हेमराज तामाङले जानकारी दिए। 

तिहार लक्षित सुरक्षा योजनामा थप तीन सय प्रहरी परिचालन भएका छन्।