काठमाडौंमा १८ वर्ष माथिकालाई खोप लगाइँदै

काठमाडौं– काठमाडौं महानगरपालिकाका ३२ वटै वडामा आजबाट कोभिडविरुद्धको खोप एस्ट्राजेनेकाको पहिलो मात्रा लगाउन सुरु गरिएको छ। 

महानगरपालिकाले काठमाडौं महानगरपालिका भित्रका ३२ वटै वडाका खोप केन्द्रका साथै विभिन्न ७ वटा अस्प्तालबाट खोप लगाउँदैछ। 

खोप लगाइने अस्पतालहरूमा नेपाल प्रहरी अस्पताल महाराजगञ्ज, त्रिवि शिक्षण अस्पताल महाराजगञ्ज, वीर अस्पताल, सशस्त्र प्रहरी बल अस्पताल बलम्बु, निजामती कर्मचारी अस्पताल बानेश्वर, परोपकार प्रसूति तथा स्त्रीरोग अस्पताल थापाथली र वीरेन्द्र अस्पताल छाउनी रहेका छन्। खोप लगाउन जाँदा परिचय खुल्ने परिचयपत्र लिएर जान महानगरले आग्रह गरेको छ। 

जिल्लास्तरीय खोप समन्वय तथा अनुगमन समिति काठमाडौंको आइतबारको निर्णय अनुसार खोप लगाउन बाँकी १८ बर्ष माथिका सबैलाई आजबाट एस्ट्राजेनेका खोपको पहिलो मात्रा दिन लागिएको हो। खोप बिहान १० देखि अपरान्ह ४ बजेसम्म चल्नेछ।