अनशन तोडेको महिना दिनपछि डा. केसीको प्रश्न– सम्झौता कार्यान्वयन प्रकृया कहाँ पुग्यो ?

काठमाडौं– चिकित्सा शिक्षा सुधारका अभियन्ता डा. गोविन्द केसीले १९ औं सत्याग्रह र त्यसअघिका सत्याग्रहका सम्झौता कार्यान्वयन नभएको भन्दै सम्बन्धित सबै पक्षलाई खबरदारी गर्न आग्रह गरेका छन्।

आज बिहीबार पत्रकार सम्मेलन गर्दै डा. केसीले १९ औं सत्याग्रहमा भएको सम्झौताको पनि कार्यान्वयन प्रकृया कहाँ पुगेको छ भनेर प्रश्न गरेका छन्। 

१९ औं सत्याग्रहमा भएको सम्झौतामा केही तत्काल गरिहाल्नुपर्ने र अरु लामो समय लाग्ने तर काम सुरु गरिहाल्नु पर्ने बुँदाहरु भएकाले कार्यान्वयन प्रक्रियाबारे डा. केसीले चासो दिएका हुन्। 

१९ औं सत्याग्रहको सम्झौता भएको १ महिना पुग्नै लाग्दा डा. केसीले सरकारले यस अगाडि बारम्बार सम्झौता विपरीत काम गरेकाले सरकारलाई खबरदारी गर्नुको विकल्प नभएको पत्रकार सम्मेलनमा बताएका छन्। 

साथै सम्झौता कार्यान्वयन भएमा मेडिकल शिक्षाको गुणस्तर कायम राख्ने दिशामा नेपालले ठूलो फड्को मार्ने डा. केसीको भनाइ छ। सरकारले स्वास्थ्य र शिक्षामा पनि व्यापार गरेर जनतालाई सेवा दिन कुनै चासो नदेखाएको आरोप लगाएका छन्। 

पदाधिकारी नियुक्तिका लागि विज्ञहरुका समितिको प्रतिवेदनलाई लत्याएमा देशका विश्वविद्यालय र प्रतिष्ठानहरु कार्यकर्ता भर्ती थलोको रुपमा चिनिने उनले बताएका छन्।

सम्झौता कार्यान्वयन नभए २० औं सत्याग्रह सुरु गर्ने चेतावनी डा. केसीले दिएका छन्।