काठमाडौं– आर्सनलले इंग्लिस प्रिमियर लिगमा म्यानचेस्टर युनाइटेडविरुद्ध संघर्षपूर्ण जित निकालेको छ। युनाइटेडको मैदानमा सम्पन्न खेलमा आर्सनलले १–० गोलको संघर्षपूर्ण जित निकालेको हो।
आर्सनलको जितका लागि पियरे इमिरेक अबुमयाङले निर्णायक गोल गरे। खेलको ६९ औं मिनेटमा पाउल पोग्वाले आर्सनलका विलियममाथि फाउल गरेपछि पाहुना टिमले पेनाल्टीको अवसर पाएको थियो। सो अवसरको सदुपयोग गर्दै कप्तान अबुमयाङ निर्णायक गोल गरे।
जितसँगै ७ खेलबाट १२ अंक बनाएको आर्सनल नवौं स्थानमा छ भने ६ खेलबाट ७ अंक बनाएको युनाइटेड अंकतालिकाको १५ औं स्थानमा छ।
त्यस्तै आइतबार राति नै सम्पन्न अर्को खेलमा टोटेनहमले ब्राइटोनलाई २–१ गोलले हराएको छ। टोटेनहमको जितका लागि ह्यारी केनले पेनाल्टीमा गोल गरे भने ग्यारेथ बेलले एक गोल गरे।
जितसँगै टोटेनहम दोस्रो स्थानमा छ भने पराजित ब्राइटोन १५ औं स्थानमा छ। टोटेनहमको १४ अंक छ।