नयाँ दिल्ली - बंगालको खाडीमा चक्रावतीय तूफानको अवस्थितिलाई ध्यान दिँदै तटवर्ती राज्य ओडिशा र आन्ध्र प्रदेशमा साइक्लोनको अलर्ट जारी गरिएको छ।
भारतको मौसम विभागका अनुसार ओडिशाका सातवटा जिल्लामा हाइ अलर्ट जारी गरिएको भारतीय समाचार एजेन्सी पीटीआईले जनाएको छ। विभागका अनुसार चक्रवातीय तूफान ओडिशाको दक्षिण इलाका हुँदै छिमेकी राज्य आन्ध्र प्रदेशसम्म पुग्ने अनुमान गरिएको छ।
सरकारले अलर्ट जारी गरिएको जिल्लामा उद्धार टोली पठाइसकेको जनाइएको छ। त्यसैगरि तटीय क्षेत्रमा रहेका नागरिकहरुलाई सुरक्षित स्थानमा सार्नका लागि निर्देशन दिइसकेकोसमेत जनाइएको छ।
ओडिशाका सात जिल्ला गजपति, गञ्जम, रायगढ, कोरापुट, मलकानगिरी, नमरंगपुर र कन्धमालामा ओडिशा डिजास्टर एक्सन फोर्सका ४२ टोली परिचालन गरिएको र नेशनल रेस्पोन्स फोर्सका २४ टोली पठाइएको जनाइएको छ।
मौसम विभागले ओडिशाको गञ्जम क्षेत्र धेरै प्रभावित हुनसक्ने जनाएको छ। उक्त जिल्लामा मात्र १५ वटा उद्धार टोली परिचालन गरिएको छ।