प्रदेश २ :  अनुसन्धान ब्युरो गठनको बाटो खुल्यो

जनकपुरधाम– प्रदेश २ को प्रदेशसभा बैठकले अनुसन्धान ब्युरो गठन सम्बन्धी विधेयक सर्वसम्मत पारित गरेको छ। 
विधेयक पारित भएसँगै प्रदेश २ सरकारले अब आफ्नै अनुसन्धान ब्युरो गठन गर्न पाउनेछ। 
आइतबार बसेको प्रदेश २ को प्रदेशसभा बैकठले अनुसन्धान ब्युरो गठनसम्बन्धी विधेयक संशोधनसहित पारित गरेको हो। 

बैठकमा आन्तरिक मामिला तथा काननुमन्त्री ज्ञानेन्द्रकुमार यादवले संशोधनसहितको सो विधेयक पेस गरेका थिए। 

विधेयकमा प्रदेशभित्र शान्ति सुरक्षा तथा सुव्यवस्था कायम राखी प्रदेशको हित तथा विकास, औद्योगीकरण, व्यापार व्यवसाय प्रवर्धन गर्न ब्युरोले सूचना संकलन गरी प्रशोधन गर्ने उल्लेख छ। 

विधेयकमा मन्त्रिपरिषद्ले कुनै विषयमा अनुसन्धान गर्न आदेश दिएमा ब्युरोले सोको अनुसन्धान गरी प्रतिवेदन मन्त्रिपरिषदमा प्रस्तुत गर्नुपर्नेछ। 
प्रदेश प्रमुखले विधेयक प्रमाणीकरण गरेपछि कानुनको रुप लिनेछ।