काठमाडौं– सुदूरपश्चिम प्रदेश क्रिकेट संघले आकस्मिक सुरक्षा कोष स्थापना गर्ने भएको छ।
उसले सुदूरपश्चिमका जिल्ला संघबाट ५–५ हजार र प्रदेशबाट १५ हजार जम्मा गरेर कोष निर्माण गर्ने निर्णय गरेको हो।
प्रदेश अध्यक्ष हरि रेग्मीको अध्यक्षतामा आज शनिबार जुममार्फत बसेको बैठकले कोष स्थापना गर्ने लगायत विभिन्न विषयमा निर्णय गरेको छ। प्रादेशिक संघले असोज अन्तिमसम्ममा पछिल्लो आर्थिक वर्षको लेखा परीक्षण सम्पन्न गरेर प्रदेशमा पेश गर्नुपर्ने निर्णय गरेको छ भने कात्तिकभित्रमा जिल्लाका क्लबहरुले जिल्ला प्रशासन कार्यालयमा दर्ता हुनुपर्ने भएको छ।
साथै क्लबले दर्ताको प्रमाणपत्र जिल्ला संघलाई अनिवार्य बुझाउन प्रादेशिक संघले भनेको छ। त्यस्तै, बैठकले प्रादेशिक संघबाट माग भएका विवरण साधारण सभापूर्व नै उपलब्ध गराउन जिल्ला संघहरुलाई निर्देशन दिएको छ। संघको साधारण सभा कात्तिक अन्तिम हप्ता हुने भएको छ।
त्यस्तै, जिल्ला संघहरुले कात्तिक तेस्रो सातामा साधारण सभा गरिसक्नुपर्ने प्रादेशिक संघले निर्देशन दिएको छ। बैठकले प्रदेशलाई प्रशासनिक अनुदान कार्य समितिबाट स्वीकृत गराई खर्च गर्ने र बाँकी रकम निकास गर्न नेपाल क्रिकेट संघ(क्यान)लाई अनुरोध गरेको छ। अब प्रदेशले आफ्नै कर्मचारी नियमावली बनाउने भएको छ।