जनकपुरधाम- प्रत्येक शनिवार निःशुल्क स्वास्थ्य शिविरको आयोजना गर्दै आएको महेन्द्रनारायण निधि स्मृति प्रतिष्ठान कोभिड–१९ क्वीक रेस्पोन्स टिमले पाँचौ साता पनि निःशुल्क स्वास्थ्य शिविरलाई निरन्तरता दिएको छ।
कोरोना महामारीको समयमा अन्य रोगका बिरामीहरु उपचारबाट बञ्चित भइरहेको समयमा प्रतिष्ठानले सर्वसाधारणलाई विभिन्न सहयोग तथा परामर्शका लागि प्रत्येक शनिबार अलगअलग स्थानमा स्वास्थ्य शिविरको आयोजना गर्दै आइरहेको छ। प्रतिष्ठानले आज धनुषाको धनौजी गाउँपालिका ४ बहुअर्वास्थित वासुदेव माविमा पाँचौ साताको स्वास्थ्य शिविरको आयोजना गरेको हो।
निःशुल्क स्वास्थ्य शिविरमा ६ सयभन्दा बढी बिरामीलाई उपचार गरिएको कोभिड १९ क्वीक रेस्पोन्स टिमका सदस्य जिवनाथ चौधरीले जानकारी दिए। स्वास्थ्य शिविरमा विभिन्न रोगका बिरामीहरुलाई उपचार गरिएको उनले बताए।
बिरामीलाई चेकजाँच गर्नुका साथै औषधिसमेत निःशुल्क उपलब्ध गराइएको थियो। निःशुल्क स्वास्थ्य शिविरलाई थप प्रभावकारी बनाउन सोही स्थानमा ल्याबको समेत व्यवस्था गरिएको थियो। उपचार गराउन आएका विरामीहरूलाई निःशुल्क मास्कसमेत वितरण गरिएको थियो।