ओली-दाहाल छलफल सकियो

काठमाडौं- सत्तारुढ नेकपाका अध्यक्षद्वय केपी शर्मा ओली र पुष्पकमल दाहालबीचको छलफल सकिएको छ।

प्रधानमन्त्री निवास करिब साढे २ घन्टा लामो छलफल भएको हो। पार्टी एकताको बाँकी काम सक्ने विषयमा नै केन्द्रित रहेको छलफलमा ठोस सहमतिमा भने अध्यक्षद्वय पुगिनसकेको स्रोतले जानकारी दिएको छ।

महासचिव विष्णु पौडेलसमेत सहभागी भएको छलफलमा अध्यक्षद्वयले पार्टी एकताको बाँकी काम टुंग्याउन प्रस्ताव तयार पार्ने विषयमा नै छलफल केन्द्रित गरेको बताइएको छ। 

छलफललाई निरन्तरता दिने भन्दै आजको भेटवार्ता सकिएको बालुवाटार स्रोतले जानकारी दिएको छ। 

केही दिनदेखि दुई अध्यक्षबीच छलफल निरन्तर भइरहे पनि ठोस निष्कर्ष निस्किएको छैन। ६ असोजमा बसेको सचिवालय बैठकले एकताको बाँकी काम टुंग्याउन १० दिनभित्रमा प्रस्ताव तयार पार्ने जिम्मा अध्यक्षद्वय र महासचिवलाई दिएको थियो।

१० दिनको समय बितिसक्दा पनि प्रस्ताव तयार पार्ने काम सकिएको छैन। नेकपामा जनवर्गीय संगठनहरू, पाँचवटा निकाय, ३२ विभागसहित एक नीति प्रतिष्ठान, प्रवास समन्वय र विशेष जिल्ला कमिटीले पूर्णता पाउन बाँकी छ।

त्यस्तै मन्त्रीपरिषद पुनर्गठन पनि अहिलेसम्म अन्यौलमै रहेको छ। दुई अध्यक्षबीच पुनर्गठनका विषयमा सहमति बन्न नसक्दा ढिला भइरहेको छ।