काठमाडौं- जापानमा गरिएकाे एक अध्ययनले कोरोना (सार्स कोभ–२) भाइरस मानिसको छालामा नौ घण्टासम्म जीवित रहने पत्ता लगाएको छ, यो फ्लू भाइरसको तुलनामा लामो समय हो।
क्लिनिकल इन्फेक्सियस डिजिज जर्नलमा प्रकाशित क्योटो प्रिफेक्चुरल युनिभर्सिटी अफ मेडिसिनको उक्त अध्ययनअनुसार कोरोना (सार्स कोभ–२) भाइरसलाई इथानोलले १५ सेकेन्डभित्र मार्छ।
इथानोल हामीले प्रयोग गर्ने स्यानिटाइजरमा पनि हुन्छ। यस्तो स्यानिटाइजरमा इथानोलको मात्रा ७५ प्रतिशतभन्दा माथि हुनु जरुरी छ।
मानव छालामै नौ घण्टासम्म जीवित रहने भएकाले यो महामारी कन्ट्याक्ट ट्रान्समिसनबाट द्रुत गतिमा फैलिरहेको अध्ययन् प्रतिवेदनमा उल्लेख छ।
यद्यपि, स्टिल, ग्लास, प्लास्टिक जस्ता अन्य वस्तुको सतहभन्दा मानव छालामा यो चाँडै समाप्त हुने गरेको पाइएको छ। यो भाइरस तामाको सतहमा चार घण्टासम्म, कार्डबोर्डमा २४ घण्टासम्म र प्लास्टिकको सहतमा ७२ घण्टासम्म जीवित रहेको पाइयो।