चितवन– कोरोना सङ्क्रमण पुष्टि भएर घरमै आइसोलेसनमा बसेका एक वृद्धको मृत्यु भएको छ।
मृत्यु हुनेमा चितवनको भरतपुर महानगरपालिका २० माइली चोकका ६७ वर्षीय पुरुष हुन्।
जिल्ला प्रहरी कार्यालय चितवनले दिएको जानकारीअनुसार उनको शुक्रबार राति ९ बजे मृत्यु भएको हो।
क्यान्सरका बिरामी उनको नियमित स्वास्थ्य परीक्षणका क्रममा असोज २१ गते स्वाब परीक्षणका लागि दिइएकोमा २३ गते कोरोना सङ्क्रमण पुष्टि भएको थियो।
योसँगै जिल्लामा कोरोना सङ्क्रमण पुष्टि भई होम आाइसोलेसनमा रहेका पाँच जनाको मृत्यु भएको छ।
जिल्लामा कोरोना सङ्क्रमणका कारण मृत्यु हुनेको सङ्ख्या भने योसँगै ३१ पुगेको स्वास्थ्य कार्यालय चितवनले जनाएको छ।
कार्यालयका अनुसार हालसम्म जिल्लामा दुई हजार पाँच सय ९७ जनामा कोरोना सङ्क्रमण पुष्टि भएको छ। त्यसमध्ये एक हजार पाँच सय ५३ जना निको भएर घर फर्किसकेका छन्।