काठमाडौं- नेपाल चिकित्सक संघले घोषणा गरेको आन्दोलनका कार्यक्रम स्थगित गरेको छ।
अनशनरत डा. गोविन्द केसीको जीवन रक्षाका लागि भन्दै संघले आजदेखि चरणबद्ध आन्दोलनका कार्यक्रम घोषणा गरेको थियो।
डा. केसीसँग सरकारले वार्ता सुरु गरेपछि संघले आन्दोलन स्थगित गरेको हो। संघले प्रेस विज्ञप्ति जारी गर्दै आन्दोलनका कार्यक्रम स्थगित गरेको जनाएको छ।
सरकारले टोली बनाएर वार्ता अगाडि बढाएको र कोभिड–१९ को महामारीलाई समेत ध्यानमा राख्दै संघले घोषणा गरेका कार्यक्रम स्थगित गरेको हो।
बिहीबारबाट सुरु भएको डा. केसी र सरकार पक्षको वार्ता सकारात्मक रुपमा अगाडि बढेको बताइएको छ।
डा. केसी पक्ष र सरकार पक्षबीच बिहीबार बिहानदेखि सुरु भएको वार्ता रातिसम्म टुंगो नलागेपछि आज बस्ने गरी स्थगित भए पनि अहिलेसम्म सुरु भएको छैन।