कोरोनाबाट थप ४ जनाको मृत्यु, मृतकको संख्या ५८२ पुग्यो

काठमाडौं– कोरोना भाइरसको संक्रमणबाट बुधबार बेलुका र बिहीबार बिहान थप ४ जनाको मृत्यु भएको छ । 

मोरङको विराटनगर, सुनसरीको धरान, धनुषाको जनकपुर र रुपन्देहीको बुटवलमा एक/एक जना गरेर थप ४ जनाको मृत्यु भएको हो । यो सँगै हालसम्म देशभर कोरोनाबाट ज्यान गुमाउनेको संख्या ५ सय ८२ पुगेको छ । 

बुधबार अपरान्ह कोरोनाबाट ज्यान गुमाउनेको संख्या ५ सय ७८ पुगेको स्वास्थ्य मन्त्रालय जनाएको थियो । हिजो मात्रै १५ जना कोरोना संक्रमितको मृत्यु भएको थियो । 

मोरङको विराटनगर महानगरपालिका-५ मा एक कोरोना संक्रमित पुरुषको होम आइसोलेशनमा मृत्यु भएको छ । संक्रमणपछि घरमै बसेको ८२ वर्षीय वृद्धको आज बिहान ६ः३० बजेतिर मृत्यु भएको हो । 

यस्तै सुनसरीको धरान-१० घर भएका ३९ वर्षीय युवाको पनि आजै कोरोना संक्रमणबाट मृत्यु भएको छ । 

बीपी कोइराला स्वास्थ्य विज्ञान प्रतिष्ठानमा उपचाररत उनको आज बिहान ४ः३० बजे उनको मृत्यु भएको प्रतिष्ठानका सहायक प्रवक्ता आशिष श्रेष्ठले जानकारी दिएका छन् । 

असोज १२ गते कोरोना संक्रमण पुष्टि भएपछि उनी भोलिपल्ट अस्पताल भर्ना भएका थिए । 

यस्तै कोरोनाबाट धनुषाको शहिदनगर नगरपालिकामा एक ७० वर्षीय पुरुषको मृत्यु भएको छ । 

प्रादेशिक अस्पताल जनकपुरमा उपचारको क्रममा उनको बुधवार साँझ मृत्यु भएको हो।  उनी असोज २० गते अस्पताल भर्ना भएका थिए । 

त्यस्तै बुटवल उपमहानगरपालिका वडा नं ६ का ४७ वर्षीय पुरुषको कोरोनाबाट मृत्यु भएको छ । रुपन्देहीको बुटवलस्थित कोरोना विशेष अस्थायी अस्पतालमा उपचाररत उनको बुधबार साँझ मृत्यु भएको हो ।