भेरीका किसानलाई टेलिफोनबाटै प्राविधिक सल्लाह

सुर्खेत– जाजरकोटको भेरी नगरपालिकाका किसानहरुले अबदेखि टेलिफोनबाटै प्राविधिक सल्लाह लिन सक्ने भएका छन्। नगरपालिकाले ‘किसान कल सेन्टर’ सञ्चालनमा ल्याएसँगै किसानले टेलिफोनबाटै प्राबिधिक सल्लाह लिन सक्ने भएका हुन् ।

‘कृषकलार्ई प्राविधिक सल्लाह दिन र गुनासाहरुको सम्बोधन गर्न किसान कल सेन्टर सञ्चालनमा ल्याएका छौँ,’ नगरपालिकाका कृषि शाखा प्रमुख यज्ञबहादुर अधिकारी भने, ‘अब प्राविधिक सल्लाह लिन किसानहरु गाउँबाट नगरपालिकामा आउनु पर्दैन ।’ कल सेन्टरको टोलफ्रि नम्बर १६६०८९४३००३ मा फोन गर्दा कृषकले पैसा तिर्नु पर्दैन ।

टोलफ्रि नम्बरमा कृषकले राखेका समस्याअनुसार कृषि र पशुतर्फका प्राविधिकहरुले टेलिफोनबाटै सल्लाह दिनेछन् । भौगोलिक विकटता र कोरोना भाइरसको महामारीका कारण प्राविधिकहरु सबै क्षेत्रमा पुग्न नसक्ने भएपछि कल सेन्टर सञ्चालनमा ल्याइएको अधिकारीले बताए ।

कल सेन्टर सञ्चालनमा आएसँगै खाद्यान्न उत्पादन बढ्ने र व्यवसायिक कृषकलाई राहत मिल्ने नगरपालिकाको अपेक्षा छ । उत्पादन बढाउन नगरपालिकाले बेलाबेलामा कृषकलाई उन्नत जातका बिउबिजनहरु वितरण गर्दै आएको छ । कल सेन्टर बिहीबार एक कार्यक्रमका बीच उद्घाटन गरिएको हो ।