मुम्बई पुग्यो शीर्ष स्थानमा, हैदराबादविरुद्ध ३४ रनको जित

काठमाडौं- इन्डियन प्रिमियर लिग (आईपीएल) अन्तर्गत आज (आइतबार) सम्पन्न पहिलो खेलमा साविक विजेता मुम्बई इन्डियन्स ३४ रनले विजयी भएको छ।

यूएईको शारजाह मैदान टस जितेर पहिले ब्याटिङमा आएको मुम्बईले सनराइजर्स हैदराबादमाथि जित निकालेको हो।

पहिलो पारी सम्हालेको मुम्बईले निर्धारित ओभरमा ५ विकेट गुमाउँदै १०.४ को रन रेटमा २०८ रन बनायो। २०९ रनको लक्ष्य पछ्याएको हैदराबाद निर्धारित ओभरमा ७ विकेट गुमाएर १७४ रनमै समेटियो।

मुम्बईका ओपनर क्विन्टन डि ककले ४ चौका र चार छक्काको मद्दतमा सर्वाधिक ६७ रनको बनाए।

त्यस्तै, सूर्यकुमार यादव, हार्दिक पाण्ड्या र इसान किसनले २७, २८ र ३१ रन बनाए भने किरोन पोलार्डले अविजित २५ रन बनाए। तर कप्तान रोहित शर्मा भने ६ रनमै आउट भए।

यता हैदराबादका सन्दीप शर्मा र सिद्धार्थ कौरले २–२ विकेट लिए भने रशिद खानले १ विकेट लिए।

जवाफी ब्याटिङमा आएको हैदराबादका कप्तान डेबिड वार्नरले सर्वाधिक ६० रन बनाए। ओपनर जोन्नी ब्रिस्टोले २५ रन बनाए। त्यस्तै, मनिष पाण्डेले ३० रन जोड्दा केन विलियम्स तीन रनमै पेवेलियन फर्किए। अन्य खेलाडीमा अब्दुल समदले २० रन बनाउनुबाहेक कसैले सम्झनलायक प्रदर्शन गरेनन्।

बरु मुम्बईका ट्रेन्ट बोल्ट, जस्प्रित बुमराह र जेम्स पट्टिन्सनले समान २–२ विकेट लिए। क्रुनल पाड्याले एक विकेट लिए।

आईपीएल अंकतालिकामा ६ अंक बनाएको मुम्बई शीर्षस्थानमा छ। समान ६ अंक भएका दिल्ली र बैंगलोर नेट रन रेटका आधारमा दोस्रो र तेस्रो स्थानमा छ।

पराजित हैदराबाद भने ४ अंकका साथ छैटौं स्थानमा छ।

आईपीएलको दोस्रो खेलमा अहिले दुबई रंगशालामा चेन्नई र पञ्जाबको खेल भइरहेको छ।