काठमाडौं– कांग्रेसको अहिले बिहान नौ बजेका लागि बोलाइएको पदाधिकारी बैठक स्थगित भएको छ।
१९ गते तय भएको केन्द्रीय समिति बैठकको तयारीस्वरुप २४३ जनामा गरिएको कोरोना परीक्षणमा केन्द्रीय सदस्य गगन थापा, अजुर्ननरसिंह केसीलगायत नेताहरुका स्वकीय सचिव, सुरक्षाकर्मी र कर्मचारी गरेर ७० जनालाई कोरोना देखिएपछि बैठक स्थागित भएको हो।
कोरोना संक्रमण पुष्टि भएसँगै असोज १९ का लागि बोलाइएको केन्द्रीय समिति बैठक पनि बस्ने सम्भावना नरहेको एक केन्द्रीय सदस्यले नेपाल समयलाई बताए ।
केन्द्रीय कार्यसमिति बैठकका एजेन्डाबारे शनिबार पनि कांग्रेस पदाधिकारी, पूर्वपदाधिकारी र केही केन्द्रीय सदस्यबीच छलफल भएको थियो।
आज (आइतबार) बिहान ९ बजे केन्द्रीय कार्यालय सानेपामा बोलाइएको पदाधिकारी बैठक स्थगित गरिएको हो।
शनिबारको बैठकमा वरिष्ठ नेता रामचन्द्र पौडेलले आफूले हस्ताक्षरसहित बुझाएको ध्यानाकर्षणपत्रबारे स्पष्ट पारेका थिए।
बैठकमा महामन्त्री पूर्णबहादुर खड्काले विधानविपरीत कुनै काम नभएको जिकिर गरेका थिए।
आज महामन्त्री शशांक कोइराला, उपसभापतिद्वय विजयकुमार चच्छदार, विमलेन्द्र निधि र सभापति शेरबहादुर देउवाले धारणा राख्ने बताइएको थियो।
‘समितिकै साथी, सुरक्षाकर्मी, चालकलगायतलाई कोरोना देखिएको छ,’ एक केन्द्रीय सदस्यले भने, ‘यस्तो १९ गतेको बैठक पनि कसरी बस्छ?’