काठमाडौं- २ सय १३ देशमा फैलिएको कोरोना भाइरसबाट करिब साढे ३ करोड ब्यक्ति संक्रमित भएका छन् । त्ससमध्ये ७१ प्रतिशत संक्रमित १० देशमा रहेका छन् ।
शुक्रबार बिहानसम्ममा कोरोनाबाट ३ करोड ४४ लाख ८४ हजारभन्दा धेरै संक्रमित हुँदा अमेरिका, भारत, ब्राजिल, रुस, कोलम्बिया, पेरु, स्पेन, अर्जेन्टिना, मेक्सिको र दक्षिण अफ्रिकासहितका १० देशमा मात्रै २ करोड ४५ लाख ४२ हजार संक्रमित छन् । जुन ७१ प्रतिशत हो ।
कोरोनाबाट सबैभन्दा बढि प्रभावित भएका तीन मुलुक अमेरिका, भारत र ब्राजिलमा मात्रै ५४.३३ प्रतिशत संक्रमित छन् । यी तीन देशका संक्रमित जोड्दा १ करोड ८७ लाख ३५ हजार हुन्छ ।
अमेरिकामा राष्ट्रपति डोनाल्ड ट्रम्पसहित ७४ लाख ९४ हजारभन्दा धेरै कोरोना भाइरसबाट संक्रमित भएका छन् । जुन विश्वभर रहेका संक्रमितमध्ये २१.७३ प्रतिशत हो ।
यस्तै विश्वभरका सम्पूर्ण कोरोना संक्रमितमध्ये १८.५४ प्रतिशत संक्रमित छिमेकी मुलुक भारतमा छन् । जहा शुक्रबार बिहानसम्ममा ६३ लाख ९४ हजारभन्दा धेरैमा कोरोना पुष्टि भएको छ ।
विश्वभर कोरोनाबाट १० लाख बढि संक्रमित हुने मुलुकको संख्या ४ छ भने ५ लाखभन्दा धेरै संक्रमित भएका मुलुकको संख्या ११ पुगेको छ ।
३८ देशमा एक लाखभन्दा धेरै ब्यक्ति कोरोनाबाट संक्रमित भएका छन् । नेपालमा भने कोरोनाबाट ७९ हजार ७ सय २८ जना संक्रमित भएका छन् ।