विराटनगर– मोरङको सुन्दरहरैँचा नगरपालिका–३ आइतबारेमा बोक्सीको आरोप लगाउँदै एक महिलामाथि कुटपिट भएको छ।
स्थानीय २९ वर्षीया धनहीरा राईले छिमेकी ३८ वर्षीया महिलामाथि कुटपिट गरेको प्रहरीले जनाएको छ। घटनाको भिडियोसहित पीडित पक्ष बिहीबार बिहान प्रहरी कार्यालय पुगेपछि घटना बाहिर आएको हो। पीडित पक्षले किटानी जाहेरी दिएपछि कुटपिटमा संलग्न धनहीरालाई प्रहरीले नियन्त्रणमा लिएको छ।
आफ्नो शरीरमा धामी उत्रिएको भन्दै उनी थाल बजाएर मंगलबार साँझबाट चिन्ता बसेकी थिइन्। त्यही चिन्ता हेर्न आएकी छिमेकी महिलालाई धनहीराले बुधबार बिहान ४ः३० बजेतिर बोक्सीको आरोप लगाउँदै कुटपिट गरेको प्रहरीले जनाएको छ।
प्रहरीका अनुसार धामी बस्दा प्रयोग गरेको त्रिशूलले प्रहार गरिएकी महिलाको पेट, हात, काँध, पाखुरा लगायत शरीरका विभिन्न भागमा चोट लागेको छ।
चोट लागेको ठाउँबाट धेरै रगत पनि बगेको प्रहरीले जनाएको छ। कुटपिटबाट घाइते भएर उठ्न नसक्ने बनेकी पीडितको स्थानीय स्वास्थ्य संस्थामा उपचार गरिएको प्रहरीले जनाएको छ।
इलाका प्रहरी कार्यालय बेलबारीका प्रहरी निरीक्षक ऋषिराज ढकालले कुटपिट गर्ने महिलाविरुद्ध बोक्सी आरोपको कसुरमा कारबाही अघि बढाउन अनुसन्धान थालिएको बताए । प्रहरीले पीडित महिलाको बेलबारीमा उपचार भएको जनाएको छ ।